काठमाडौं (हाम्रो खेलकुद)– नयाँ आर्थिक वर्ष सुरु भएको साढे तीन महिना बितिसक्दा पनि दक्षिण एसियाली खेलकुद (साग) स्वर्ण पदक विजेता , एसियाली खेलकुदका पदक विजेता र ओलम्पियनले प्रोत्साहन भत्ता पाएका छैनन् । पछिल्लो वर्ष सम्म राष्ट्रिय खेलकुद परिषद् (राखेप) मार्फत बैंक खाता मार्फत भुक्तानी गरिन्थ्यो ।

भत्ता रोकिएको विषयमा जानकारी गराउन राष्ट्रिय तथा अन्तर्राष्ट्रिय खेलाडी संघ (एनएनआइपिए) का अध्यक्ष दीपक श्रेष्ठको नेतृत्वमा एक टोलीले आइतबार युवा तथा खेलकुद मन्त्रालयका सचिव रामप्रसाद थपलियालगायतसँग भेट गरेको छ ।

भेटका क्रममा नियमित प्राप्त गर्दै आएको भत्ता रोकिनु कारण बारे जिज्ञासा राखिएको अध्यक्ष श्रेष्ठले बताए । मन्त्रालयकै पत्रका आधारमा राखेपले भत्ता रोकेको भन्ने जानकारी पाएपछि एनएनआइपिएको टोली मन्त्रालय पुगेको थियो ।

भत्ता वितरणको कुनै कार्यविधि नभएकै कारण पत्र पठाइएको जानकारी सचिव थपलियाबाट प्राप्त भएको श्रेष्ठले बताए । ‘भत्तामा ठूलो रकम खर्च हुने गर्छ । तर विना कुनै कार्यविधि वितरण भइराखेकोले हरेक वर्ष बजेट माग गर्दा समस्या हुने गरेको छ, ‘ मन्त्रालयका सचिव थपलियालाई उदृत गर्दै एनएनआइपिएका अध्यक्ष श्रेष्ठले भने, ‘त्यसले अर्थमा पनि एक पटक यो विषयमा जानकारी गराउन सुझाव दिनुभएको छ ।’

पहिलो देखि १२ औं सागका स्वर्ण पदक विजेता, एसियाडका पदक विजेताले मासिक ६ हजार र ओलम्पियनले ४ हजार रुपैयाँ प्रोत्साहन भत्ता पाउँदै आएका थिए । राखेपका तत्कालिन सदस्य सचिव केशवकुमार विष्टले भत्ताको सुरुवात गरेका थिए ।

सुरुमा २ हजार ५ सयबाट सुरु भएको भत्ता दोस्रो पटक ५ हजार र तेस्रो पटक ६ हजार रुपैयाँ पुर्याइएको आठौं र नवौं सागका स्वर्ण पदक विजेता समेत रहेका एनएनआइपिएका अध्यक्ष श्रेष्ठले बताए । श्रेष्ठसँगै मन्त्रालय पुग्नेमा राखेपका सदस्य समेत रहेका एनएनआइपिएका हरि खड्का, ओलम्पियन दीपक विष्ट र १३ औं सागका दोहोरो स्वर्ण पदक विजेता मण्डेकाजी श्रेष्ठ थिए ।

युवा तथा खेलकुद मन्त्री जगतबहादुर विश्वकर्माले १३ औं सागका स्वर्ण पदक विजेताले पनि चालु आर्थिक वर्षबाट मासिक ६ हजार रुपैयाँ मासिक भत्ता पाउने बताएका थिए । १३ औं सागमा ७८ खेलाडीले देशका लागि ५१ स्वर्ण पदक जितेका थिए ।

जसमा पौडीकी गौरिका सिंहले ४, करोतका मण्डे, तेक्वान्दोकी आयशा शाक्य र गल्फका सुवास तामाङले समान २ स्वर्ण पदक जितेका थिए । त्यस्तै अन्य खेलाडी र यू २३ फुटबल टोलीले पनि स्वर्ण पदक जितेको थियो । तर, १३ औं सागका स्वर्ण पदक विजेतालाई अहिले सम्म भत्ता दिन सुरु गरिएको छैन ।

विना कार्यविधि पनि राखेपले सागका स्वर्ण पदक विजेता, एसियाडका पदक विजेता र ओलम्पियनलाई भत्ता दिँदै आएको थियो । हरेक स्वर्ण, हरेक एसियाडको पदक र ओलम्पिकको अलग अलग भत्ता दिदै आएको थियो । सागका ४ स्वर्ण, एसियाडमा २ कास्य र ओलम्पिक खेलेका दीपक विष्टले मासिक ४० हजार रुपैयाँ प्रोत्साहन भत्ता बुझ्थे ।

यसैबीच, सागका स्वर्ण पदक विजेता मण्डेले आफुहरुलाई मन्त्रालयले वितरण गर्दै आएको राष्ट्रिय युवा प्रतिभा पुरस्कारको लागि फारम नभर्न मन्त्रालयका कर्मचारीबाट सुझाव आएको सचिव थपलियालाई गुनासो गरेका छन् । माथिल्लो स्तरको पदक जितेर सरकारबाट सम्मानित भइसकेकोले युवा प्रतिभामा नदिँदा उपयुक्त हुने सुझाव मन्त्रालयबाट आएको मण्डेले सोही भेटघाटमा बताएका थिए । मन्त्रालयले हरेक वर्ष एक महिला र एक पुरुष खेलाडीलाई राष्ट्रिय पुरस्कार प्रदान गर्दै आएको छ ।