काठमाडौं (हाम्रो खेलकुद)– सूर्य नेपाल गल्फ च्यालेन्जको तेस्रो दिन बिहीबार नम्बर एक व्यवसायिक गल्फर शिवराम श्रेष्ठ शीर्षस्थानमा उक्लेका छन् । रोयल नेपाल गल्फ क्लब (आरएनजिसी) को पार ६८ को कोर्समा बिहीबार २ अन्डर ६६ को प्रदर्शन गर्दै शिवराम अग्रस्थानमा पुगेका हुन् ।

आरएनजिसीका शिवरामले तीन दिनमा समग्र ४ अन्डर २ सय को प्रदर्शन गरेका छन् । उनले जयराम श्रेष्ठलाई २ स्ट्रोकले पछि पारेका छन् । सूर्य नेपाल गल्फ टुर २०१६÷१७ अन्तर्गत दोस्रो प्रतियोगितामा अघिल्लो दिन बुधबार शीर्षस्थानमा रहेका जयरामले बिहीबार ५ ओभर ७३ को प्रदर्शन गरे । उनले समग्र प्रदर्शन २ अन्डर २ सय २ को कार्ड बनाएका छन् ।

तेस्रो स्थानमा रहेका गोकर्ण गल्फ क्लबका भुवन नगरकोटीले समग्रमा इभन पार २ सय ४ को प्रदर्शन गरे । उनले तेस्रो दिन २ ओभर ७० को कार्ड बनाए । इभन पार ६८ को कार्ड बनाएका रामे मगरको समग्र प्रदर्शन २ ओभर २ सय ६ को छ र उनी चौथो स्थानमा छन् । सञ्जय लामा पाँचौं स्थानमा झरेका छन् । उनले ९ ओभर ७७ को कार्ड बनाए ।

चुडाबहादुर भण्डारी छैटौं स्थान उक्लदा समग्रमा ५ ओभर २ सय ९ को प्रदर्शन गरे । उनले तेस्रो चरणमा १ अन्डर ६७ को कार्ड बनाए । रवि खड्का (७०), धनबहादुर थापा र दीपक मगर समग्रमा ६ ओभर २ सय १० को कार्ड साथ सातौं स्थानमा छन् । रामकृष्ण श्रेष्ठ (७५), विकास अधिकारी (७५) र सूर्यप्रसाद शर्मा (७१) ११ ओभर २ सय १५ को प्रदर्शन गर्दै संयुक्त रुपमा दसौं स्थानमा छन् ।
फ्रन्ट नाइनमा १ ओभर ३५ को कार्ड बनाएका शिवरामले ब्याक नाइनमा ३ अन्डर ३१ को प्रदर्शन गरे । उनले फ्रन्ट नाइनको दोस्रो होलमा बर्डि तथा तेस्रो र नवौं होलमा बोगी गरेका थिए । ब्याक नाइनमा उनले ११ औं, १३ औं र १४ होलमा उनले बर्डिज गरेका थिए । जयरामले फ्रन्ट नाइमा ४ ओभर ३८ र ब्याक नाइनमा १ ओभर ३५ को प्रदर्शन गरे । फ्रन्ट नाइनमा इभन पार ३४ गरेका भुवनले ब्याक नाइनमा २ ओभर ३६ को कार्ड बनाए । त्यस्तै रामेले फ्रन्ट नाइनमा १ ओभर ३५ र ब्याक नाइनमा १ अन्डर ३३ को कार्ड बनाए ।
एमेच्योरतर्फ ६ ओभर ७४ को प्रदर्शन गरेका मिथुन राई शीर्षस्थानमा छन् । तीन चरणमा उनले समग्रमा ११ ओभर २ सय १५ को प्रदर्शन गरेका छन् । सन्तोष रोक्का (७२) दोस्रो र शिवकुमार माझी (७६) को तेस्रो स्थानमा छन् । २२ व्यवसायिक र ६ एमेच्योर गल्फरले शुक्रबार अन्तिम चरणमा प्रतिस्पर्धा गर्नेछन् ।
नेपाल प्रोफेसनल गल्फर एसोसिएनको आयोजना र सूर्य नेपाल प्रा लिको प्रायोजनमा जारी प्रतियोगितामा ४ लाख रुपैयाँ पुरस्कार रहेको छ । विजेताले ७५ हजार, दोस्रो हुनेले ४६ हजार र तेस्रो हुने खेलाडीले ३१ हजार ५ सय प्राप्त गर्नेछन् ।