काठमाडौं, असोज १६

अघिल्लो दिन सम्म तेस्रो स्थानमा रहेका सञ्जय लामाले बिहीबार सूर्य नेपाल सेन्ट्रल ओपन गल्फको उपाधि जितेका छन् । ७२ पारको गोकर्ण गल्फ क्लबमा प्लेअफसम्म प्रतिस्पर्धा गर्दै उनले खेल जीवनको तेस्रो उपाधि जितेका हुन् ।

सञ्जयले दोस्रो अतिरिक्त होलमा साबिक विजेता शिवराम श्रेष्ठलाई पराजित गरेका थिए । सञ्जयले यसअघि सन् २०१० को सूर्य नेपाल वेस्टर्न ओपन र २०१४ को सूर्य नेपाल इस्टर्न ओपन जितेका थिए ।

७२ होलको खेल समाप्तिमा सञ्जय र शिवरामको स्कोर १२ अन्डर २ सय ७६ मा बराबरी भयो । बिहीबार सञ्जयले ६ अन्डर ६६ खेले । शिवरामले ४ अन्डर ६८ स्कोर गरे । अघिल्लो दुई दिन शीर्षस्थानमा रहेका भुवन नगरकोटी तेस्रो भयो । उपाधिसँगै सञ्जयले नगद १ लाख रुपैयाँ पुरस्कार पाए ।

शिवरामले ६३ र भुवनले ४५ हजार पाए । एमेच्योरतर्फ पृथ्वी मल्ल विजयी भए । नेपाल प्रोफेसनल गल्फर्स एसोसिएसन (एनपिजिए) को आयोजनामा सम्पन्न प्रतियोगिताका विजेतालाई सूर्य नेपालका मार्केटिङ एन्ड सेल्स उपाध्यक्ष दिप्रा लाहिरी, सूर्य नेपालका ब्रान्ड म्यानेजर केशव प्रधान, एनपिजिएका अध्यक्ष रवीन्द्रमान श्रेष्ठ र सल्लाहकार घनश्याम थापा लगायतले पुरस्कार वितरण वितरण गरे ।