काठमाडौं (हाम्रो खेलकुद) – नेपाली युवा टोलीले काभा यु २० पुरुष भलिबल च्याम्पियनसिपमा नेपालले तुर्किमेनिस्तानलाई पराजित गरेको छ ।

नेपालले प्रतियोगिताको आफ्नो पाँचौ खेलमा तेस्रो जित हासिल गरेको हो । श्रीलंकाको कोलम्बो जारी प्रतियोगिता शुक्रवार भएको खेलमा तुर्किमेनिस्तानमाथि नेपालले ३-० को सोझो सेटमा जित हात पार्यो ।

नेपाल‌ले पहिलो सेट २५-१४, दोस्रो सेट २५-२१ र तेस्रो सेट २५-२० ले जित्दै खेल आफ्नो पक्षमा पार्यो ।

पहिलो खेलमा नेपालले घरेलु टोली‌ श्रीलंकालाई ३-० को सोझो सेटमा पराजित गरेको थियो । दोस्रो खेलमा उज्वेकिस्तानसँग ३-१ ले पराजित नेपालले तेस्रो खेलमा माल्दिभ्सलाई ३-० को सेटमा पराजित गरेको थियो । बिहीवार भएको खेलमा नेपालमाथि किर्गिस्तानले ३-२ को सेटमा जित हात पारेको थियो ।

प्रतियोगिताको शीर्ष दुईमा रहने टोलीबीच फाइनल हुनेछ । केहि महिनाअघि काठमाडौंमा‌ भएको यु १९ भलिबल च्याम्पियनसिपमा गरेको प्रदर्शनबाट खेलाडी छनोट गरिएको हो ।

सोही प्रतियोगिताको महिला प्रतियोगितामा भाग लिएर छनोट भएका टोलीले साउनमा माल्दिभ्समा भएको काभा यु २० च्याम्पियनसिपमा कास्य पदक जितेको थियो ।

नेपाली टोली – पहल गहतराज, सुरेश मल्ल, शैलेन्द्र यादव, सुर्य विक, अर्जुन नेपाली, विश्वास अधिकारी, सागर रसौली, अशोक राना, जित बहादुर सार्की, सुजन सुनार, लेसमन राहादी र दिपेश कुवँर।