भुपेन्द्र जि.सी.,काठमाडौं

खेलाडीका समर्थक कति हुन्छन् त्यो गणना गर्न, सम्झन र चिन्न सकिँदैन । हजारौं, लाखौं र करोडौंको भिडमा त्यो सम्भव पनि हुँदैन । तर केहि यस्ता समर्थक हुन्छन् जो सधैं खेलाडीको मनमा बस्न सफल हुन्छन् । जसलाई खेलाडी खेल चलिरहँदा हजारौंको भीडमा सजिलै चिन्छन् । नेपाली क्रिकेटमा एक उदाहरण हुन् नन्दराम महर्जन उर्फ नन्दु ।

स्थानीय प्रतियोगिता होस् वा अन्तर्राष्ट्रिय, टियु मैदानमा क्रिकेट हुनेबितिक्कै नन्दु उपस्थित हुन्छन् । आफ्नो मन पर्ने खेलाडी, टोली र देशलाई सदावहार साथ र माया दिने गर्दछन् । उनको खेलप्रतिको लगावलाई शब्दमा बयान गर्न सकिदैन । विशेषगरी उनी विकेटकिपर विनोद भण्डारीका त सुपर फ्यान नै हुन् ।

नियमित उपस्थिति जनाउने नन्दुलाई नचिन्ने सायदै कुनै क्रिकेटर होलान् । कीर्तिपुरकै स्थायी बासिन्दा नन्दु दुई दशकयता नेपाली क्रिकेटलाई लगातार पछ्याउँदै आएका छन् । तर नन्दुको परिचय एक सुपर फ्यानमा मात्र सिमित छैन । फुटबल र क्रिकेटतर्फ विशेष क्षमता भएका खेलाडीले खेल्ने अन्तर्राष्ट्रिय प्रतियोगितामा पनि उनले खेलेका छन् ।

जब टियुमा खेल हुन्छ, त्यसबेला दर्शकदीर्घाबाट एउटा आवाज सुनिन्छ । जसले निरन्तर खेलाडीलाई हौसला दिइरहेका हुन्छन् । सामान्यतया खेलाडीले खेल चलिरहँदा त्यो भीडमा समर्थकको बोली चिन्न सकिँदैन र ध्यान पनि दिँदैनन् । तर नन्दुको आवाज हरेक खेलाडीले चिन्छन् र उनलाई ईशारा गर्दछन् । त्यसो नगरे नन्दु लगातार ती खेलाडीको नाम लिएर आफूतर्फ ध्यान आकर्षण गराउँछन् ।

नन्दुले विनोद धेरै अघिदेखि चिन्ने बताउँछन् । उनको विकेटकिपिङबाट प्रभावित हुँदै कट्टर समर्थक नै बने । त्यसपछि उनले विनोदको साथ कहिल्यै छाडेनन् । विनोदले राम्रो खेल्दा होस् वा नराम्रो, उनी प्राय टियुमा पनि विनोदकै जर्सीमा भेटिन्छन् । भेट्ने र उनीसँग कुरा गर्ने समर्थकलाई पनि विनोद र अन्य खेलाडीबारे गफ दिइरहेका हुन्छन् ।

‘विनोद दाईलाई पहिलादेखि नै चिनेको हो । विनोद दाईले माया गर्नुहुन्थ्यो । त्यहि भएर मन परेको हो । कहिलेकाहीँ विनोदसँग कुरा पनि गर्छु । दाइको ब्याटिङ र किपिङ सबै मन पर्छ । त्यसैले वहाँको समर्थक हुँ’, नन्दुले भने ।

गत कार्तिकमा त्रिभुवन आर्मी क्लबले प्रधानमन्त्री कप राष्ट्रिय प्रतियोगितामा नेपाल पुलिस क्लबमाथि घरेलु क्रिकेटकै उत्कृष्ट जित हात पार्यो । आर्मीले सेमिफाइनल खेलमा ३ सय ५ रनको विशाल लक्ष्य एक बल अगाडि ८ विकेट गुमाउँदै पूरा गर्यो । आर्मीको रोमान्चक जितसँगै मैदान छिरेर नन्दुले विनोदसँग अंगालो मारे ।

एउटा समर्थकको लागि यस्तो क्षण विरलै आउँछ । नेपालले होस् वा विनोद कप्तान भएको आर्मीले हार्दा । अथवा विनोदले कमजोर प्रदर्शन गर्दा नै, नन्दु रुन्छन् पनि । नन्दुको आवाज टियुमा सुनिएना भने खेलाडी पनि सोच्छन् । नन्दु आज आएन, कतै विरामी त परेन…।

‘कहिलेकाहीँ नेपालले हार्दा रुन मन लाग्छ । मेरो आफ्नो देश हो । देशको माया त लागि हाल्छ नि । टियुमा खेल हुँदा पनि रोएको छु । पारसको कप्तानीमा मलेसियामा हार्दा पनि रोएँ । शक्ति दाइले सन्न्यास लिने बेला पनि आँशु आयो । पारस दाईले क्रिकेट छाड्दा दुःख लाग्यो । अस्ति आर्मीले फाइनल हार्दा पनि रुन मन लागेको थियो’, नन्दुले भने ।

नन्दु चलाख छन् । खेल हेर्ने समयमा व्यापार पनि गर्छन् । समर्थक कम आउने प्रतियोगितामा दिनभर खेल हेरेर फर्किन्छन् । नन्दुले नेपालबाट विशेष क्षमता भएका खेलाडीले खेल्ने प्रतियोगितामा क्रिकेट र फुटबल खेलेका छन् । २००६ मा नन्दुले भारतमा क्रिकेट खेलेका थिए । त्यो बेला उनले भारतीय बलिउड नायक अक्षय कुमारसँग तस्विर खिच्ने अवसर पाएका थिए । नन्दु त्यस तस्विर देखाउँदा अहिले पनि निकै खुसी हुन्छन् । उनले अफगानिस्तानविरुद्ध २७ रन बनाउनुको साथै २ विकेट लिएका थिए रे ।

२००७ मा उनले चीनमा गएर विशेष ओलम्पिक विश्व ग्रीष्मकालिन खेल अन्तर्गत फुटबल खेले । सामान्य व्यक्तिजस्तै सानोमा नन्दु सबै खेल खेल्थे । तर ७–८ वर्षको उमेरमा कीर्तिपुर नयाँ बजार घर भएका उनी पाँच तलामाथिबाट खसेपछि केहि मानसिक असर परेको बताउँछन् । टियुमा खेल हुँदैछ भनेर उनी सामाजिक सञ्जाल र गुगलबाट थाहा पाउँछन् । खेल हेर्न नपाउँदा कहिलेकाहीँ क्यान, चिनेका मान्छे वा खेलाडीलाई सोध्छन् ।

केहि कारण नन्दु टियुमा खेल हेर्न पाएनन् भने निकै नराम्रो लाग्छ रे । पछिल्लो समय विनोद भण्डारी नेपाली टोलीमा छैनन् । जब नेपालले खेल हार्छ, नन्दु विनोदलाई नखेलाएर हारेको भन्दै समर्थकमाझ गफ पनि दिन पछि पर्दैनन् । कहिलेकाहिँ टियुमा नन्दुलाई देखेनन् भने विनोदको मन पनि आतिन्छ रे । नन्दुको समर्थनबाट विनोद पनि निकै खुसी छन् ।

‘कोहि यसरी हारमा पनि साथ दिन्छ भने खुसी लाग्छ । मलाई कस्तो लाग्छ भने उसलाई जितेपनि वा हारेपनि केहि हुँदैन । तर साथ दिइरहेको हुन्छ । टियु आएको बेला अरुको आवाज नसुने पनि उसको सुनिन्छ । किनभने उसको आवाज तिखो छ । त्यो आवाज पनि भित्र कानमा आइरहन्छ’, विनोदले भने ।

विनोदले केहि समय अघि नवौं राष्ट्रिय खेलकुदको सुरुवाती चरणमा नन्दुलाई टियु देखेनन् । सधैं टियुमा उपस्थित हुने उनलाई नदेख्दा विनोदको मन आत्तिएछ । कतै विरामी पो भएन भन्ने शंका लागेछ ।

‘अस्ति भएको नवौं राष्ट्रिय प्रतियोगितामा होला । त्यतिबेला नन्दु खेलमा आएको थिएन । त्यो बेला मलाई अर्कै अनुभव भएको थियो । खेल सकिएपछि अरु खेलाडीहरुसँग पनि कुरा गर्दै मैले भनेको थिए यो पटक नन्दु देखिएको छैन, सन्चो छैन कि जस्तो छ । तर पछि नकआउट खेलमा भने आइपुगे’, नन्दुलाई सम्झदै भने ।

नन्दुलाई विनोद, पारस खड्का, सोमपाल कामी, रोहित पौडेल लगायतका नेपाली खेलाडी मनपर्छ । खेलपछि कहिलेकाहिँ अन्य खेलाडीहरु विनोदको समर्थन गर्न छाड् जर्सी वा कुनै दिन्छु भनेर लोभ देखाउँछन् । तर नन्दुले अस्वीकार गर्छन् । यसैबाट नन्दु विनोदका कतिसम्म फ्यान हुन आफैं अनुमान गर्न सकिन्छ ।

‘उ नआउँदा पनि मलाई खल्लो खल्लो लागेको थियो । त्यस्तो नोटिस हुन्छ । किनकी हरेक खेलमा साथ दिने । एक पटक मैले पनि नन्दुसँग कुरा गरेको थिए । काठमाडौं मेयर्स कपमा पारस र म दुवैले शतक हान्नुको अघिल्लो दिन बागमती प्रदेशविरुद्ध खेल्नु अघि मैले नन्दुलाई भनेको थिएँ – भोली त पारस दाइको खेल छ । पारस दाइको सपोट नगर्ने ? ‘

‘उसको जवाफ थियो – भित्रदेखि पारस दाइको सपोर्ट पनि गर्छु । तर तपाईंको साथ भने छाड्दैन । त्यो कुराले मलाई झनै भित्रैदेखि मन छोएको थियो । नन्दु कराएपछि खेल्दा पनि अलिकति रमाइलो हुन्छ । जबसम्म मैले हात देखाएन तबसम्म मलाई बोलाइरहन्छन् । नराम्रो नलागोस भनेर मैले हात देखाउँछु’, विनोदले भने ।

कीर्तिपुर नयाँबजारका स्थानीय बासिन्दा नन्दुको एक छोरा र एक छोरी छन् । टियुमा खेलसँगै समय कटाउन व्यापार पनि गर्ने नन्दुको पारिवारिक आर्थिक अवस्था एकदम बलियो छ । प्रायः हसिलो अनुहारका साथ सामान्य जीवनशैलीमा हिँड्न रुचाउने उनले दर्शक दिर्घामै बसेर नेपाली क्रिकेटमा पहिचान बनाएका छन् । उनी नेपाली क्रिकेटका सुपर फ्यान हुन् भन्दा सायदै दुइमत होला ।

हरेक नेपाली समर्थकझैं नन्दुको अबको आशा भनेको ओडिआई मान्यता निरन्तरता होस् भन्ने छ । ‘नेपालले विश्वकप पनि खेलोस् । बलिङ, ब्याटिङ र फिटनेस नभएर राम्रो भएको छैन । खेल हुनुपर्छ । नेपालले राम्रो खेल्नुपर्छ । त्यसको लागि नेपालले अभ्यास गर्नुपर्छ’, उनले आफ्नो भनाइ सुनाए ।