काठमाडौं (हाम्रो खेलकुद) – बलात्कार आरोप लागेका क्रिकेटर सन्दीप लामिछानेले नेपाली क्रिकेट टोलीका मुख्य प्रशिक्षक मोन्टी देशाईलाई भेटेका छन् । पोखरामा बसेको नेपाल क्रिकेट संघ (क्यान) को बोर्ड बैठकले मंगलबार सन्दीपमाथि लगाएको प्रतिबन्ध फुकुवा गरेसँगै उनले मुख्य प्रशिक्षकलाई भेटेका हुन् ।

सन्दीपले मुख्य प्रशिक्षक मोन्टी देशाईलाई बुधबार भेटेको क्यान स्रोतले हाम्रो खेलकुदलाई जानकारी दिएको छ । ‘सन्दीपले आज मैदानमा प्रशिक्षकसँग कुरा गर्नु भएको रहेछ । सन्दीपले आफ्नो विचार राखे । प्रशिक्षकले पनि आफ्नो धारणा राखेका थिए’, क्यान स्रोतले हाम्रो खेलकुदलाई भन्यो ।

स्रोतका अनुसार सन्दीपले एक दुई दिन भित्र बन्द प्रशिक्षण जोडिने सम्भावना छ । जहाँ सन्दीपको प्रदर्शन छनोटकर्ता, टेनर, फिजियो र प्रशिक्षकले हेरेपछि खेलाउने वा नखेलाउने निर्णय लिइनेछ।

यता मुख्य प्रशिक्षक मोन्टी देशाईको नियुक्ती भने औपचारिक रुपमा हुन सकेको छैन । राष्ट्रिय खेलकुद परिषद् (राखेप) ले स्वीकृति नदिँदा हालसम्म औपचरिक नियुक्ती हुन सकेको छैन । केहि दिनमै नियुक्ती गर्ने बुझिएको छ । देशाई गत शनिबार नेपाल आएका थिए । आइतबार देखि टियु मैदानमा प्रशिक्षण सुरु गरेका थिए ।

दुई सातापछि घरेलु मैदान टियुमा आइसिसी विश्वकप लिग–२ त्रिकोणात्मक ओडिआई सिरिज अन्तर्गत नेपालले नामिबिया र स्कटल्यान्डसँग खेल्दैछ । त्यसको लागि नेपालले २८ सदस्य टोली बोलाएको छ ।

सन्दीप भदौ १४ पछि पहिलो पटक मैदान उत्रने सम्भावना छ । सन्दीपले अन्तिम पटक केन्या भ्रमणमा खेल खेलेका थिए । सन्दीपले अन्तिम पटक नेपालबाट भदौं ३० मा केन्यासँग पाँचौं तथा अन्तिम टि२० आई खेल खेलेका थिए । त्यसपछि सन्दीप क्वारेवियन प्रिमियर लिग (सिपिएल) खेल्न वेस्टइन्डिज पुगेका थिए । तर बलात्कार आरोप लागेपछि उनलाई जमैका तलवाजले टोलीबाट हटाएको थियो ।

भदौ ५ गते काठमाडौंको एक होटलमा लगेर नाबालिगलाई बलात्कार गरेको आरोप सन्दीपमाथि लागेको थियो । भदौ २१ गते एक नाबालिगले सन्दीपले आफूलाई पटक पटक बलात्कार गरेको भन्दै प्रहरी वृत गौशालामा किटानी जाहेरी दिएकी थिइन् ।

सन्दीपलाई बलात्कार आरोपमा काठमाडौं जिल्ला अदालतले पुर्पक्षको लागि थुनामा पठाउन कात्तिक १८ मा आदेश दिएको थियो । सन्दीपलाई पुष २८ मा उच्च अदालत पाटनले काठमाडौं जिल्ला अदालतको आदेश बदर गर्दै २० लाख धरौटीमा रिहा गर्न आदेश दिएको थियो ।