काठमाडौं (हाम्रो खेलकुद) – भक्तपुर जिल्ला खेलकुद विकास समिति र विद्या विकास सेकेण्डरी स्कुलले आइटिएफ तेक्वान्दोका पदक विजेता खेलाडीलाई सम्मान गरेको छ । त्रिपुरेश्वरस्थित नेपाल खेलकुद पत्रकार मञ्चमा आयोजित कार्यक्रममा आयोजकले आइटिएफ नेपालका खेलाडीद्धय बाबुछोरा लक्ष्मण बस्नेत र सस्मत बस्नेतलाई सम्मानित गरेको हो ।

सम्मानितहरु पहिलो लहरमा दायाँबाट क्रमश – फोटो पत्रकार रजेन्द्र केसी, आइटिएफ तेक्वान्दोका अध्यक्ष लक्ष्मण बस्नेत, खेलाडी सस्मत बस्नेत र प्रशिक्षक गयाजी खड्का ।

लक्ष्मण बस्नेत तेक्वान्दो आइटिएफ नेपालका संस्थापक अध्यक्ष एवम् प्रमुख प्रशिक्षक तथा अन्तर्राष्ट्रिय ‘ए’ क्लास रेफ्री समेत हुन् । उनले सन् २०१६ मा बेलायतमा भएको १८ औं एडल्ट, सिनियर तथा १३ औं जुनियर आइटिएफ तेक्वान्दो च्याम्पियनसिपमा सिनियर व्यक्तिगत स्पाइरिङतर्फ ६४ केजी तौल समुहमा कास्य जितेको बताइएको छ ।

उनले क्वार्टरफाइनलमा आयरल्याण्डका खेलाडीलाई पराजित गरेका थिए । बस्नेत सेमिफाइनलमा पोल्याण्डका खेलाडीसँग पराजित भएका थिए । बस्नेत आइटिएफ तेक्वान्दोमा अन्तर्राष्ट्रिय कास्य जित्ने पहिलो नेपाली हुन् । उनले २००४ मा मलेसिया ओपन आइटिएफ च्याम्पियनसिपका कास्य जितेका थिए ।

यस्तै सोही प्रतियोगिताको १४र१५ वर्ष उमेर समुहको कलर बेल्ट ६४ केजी तौल समूहमा सस्तनले रजत जितेका थिए । सोही अवसरमा फोटो पत्रकार रजेन्द्र केसी र प्रशिक्षक गयाजी खड्कालाई पनि सम्मान गरिएको थियो । पदक विजेतालाई नेपालका लागि पहिलो पदक विजेता खेलाडी ओलम्पियन धावक जित बहादुर केसीले सम्मान गरेका थिए ।