काठमाडौं (हाम्रो खेलकुद) – अष्ट्रेलियामा रहेका नेपाली समुदायका उत्कृष्ट भलिबल खेलाडीलाई सम्मानमा सिड्नीमा पोखरा भलिबल अवार्ड सम्पन्न भएको छ । भलिबल विकासमा योगदान पुर्याउनेलाई पनि सोही अवसरमा सम्पन्न गरिएको थियो ।

पोखरा भलिबल अवार्डबाट सम्मानित खेलाडी । तस्बिर सौजन्य – अमित श्रेष्ठ

पोखरा भलिबल क्लबको संयोजनमा रक्डेल स्थित रेड क्याप्सिकम फंक्सन सेन्टरमा आयोजित अवार्डमा आठ खेलाडीलाई सम्मानित गरिएको थियो । ढोरपाटनका खेम पुर्जा उत्कृष्ट खेलाडीको अवार्ड प्राप्त गरे । गल्कोट समाज अष्ट्रेलियाका दिपक अधिकारी उत्कृष्ट सर्भर, गल्कोट समाजकै लोकेन्द्र छन्त्याल उत्कृष्ट लिफ्टर, जलजला परिवारका खेम के. सी उत्कृष्ट क्विकर , म्याग्दी ओभरसिज नेप्लिज एसोसिएसन (मोना)का सुमन बानियाँ उत्कृष्ट स्पाइकर अवार्डबाट प्राप्त गरे ।

त्यस्तै नयाँ युनाइटेडका द्वारिका दवाडी उत्कृष्ट ब्लकर, गल्कोट समाज अष्ट्रेलियाका नवीन अधिकारी रुकी अफ द ईयर र जलजला परिवारका इन्द्र भण्डारी फरेभर योङ्ग प्लेयर अवार्डबाटठ सम्मानित भएको अस्ट्रेलियाबाट भलिबल खेलाडी सञ्जु पुर्जा मगरले जानकारी दिइन् ।
सिड्नीमा रहेका नेपाली समुदायबीच भलिबल लोकप्रिय खेलमध्ये एक हो । सन् २००२ देखि नै नेपालीबीच प्रतिस्पर्धा हुँदै आएपछि अवार्ड भने पहिलो पटक आयोजना गरिएको थियो ।

सोही अवसरमा भलिबल खेलको विकास र प्रवद्र्धनमा महत्वपूर्ण भूमिका निर्वाह गरेको भन्दै बागलुङ अष्ट्रेलियन कम्युनिटीका संस्थापक एवं हिमालयन रेडियोका प्रमुख कार्यक्रम निर्माता टिका कार्की, भलिबल खेलाडी तथा रेफ्री राज कुमार अधिकारी र भलिबल खेलाडी धिरज मल्ललाई सम्मान गरिएको थियो ।