काठमाडौं (हाम्रो खेलकुद)– दक्षिण कोरियाको मुजु शहरमा भएको ११औँ वल्र्ड कल्चरल एक्स्पोमा नेपालका दुई खेलाडीले स्वर्ण पदक जितेका छन् । नेपाली तेक्वान्दो खेलाडी प्रतिज्ञा भण्डारी र संगिता बस्यालले स्वर्ण पदक जितेका हुन् ।

स्वर्ण पदक जितेपछि प्रतिज्ञा भण्डारी र संगिता बस्याल (दायाँ)।

कोरियाको मुजु शहरमा भएको च्याम्पियनसिपको फाइटतर्फ राष्ट्रिय खेलाडीद्वय प्रतिज्ञाले ७६ केजी तौल समुह र संगिताले ६३ केजीमा स्वर्ण पदक जितेको राष्ट्रिय खेलकुद परिषद् (राखेप) ले जनाएको छ ।

आइतबार भएको फाइटतर्फ ६७ केजी तौलसमुहको फाइनलमा प्रतिज्ञाले अमेरिकाकी खेलाडी हराएकी थिइन् । त्यसअघि सेमिफाइनलमा प्रतिज्ञाले फिलिपिन्सकी खेलाडीलाई हराइन् । ६३ केजीमा संगिताले फाइनलमा अमेरिकी खेलाडीलाई हराइएकी थिइन् । त्यसअघि उनले सेमीफाइनलमा थाइल्यान्डकी खेलाडी पराजित गरेकी थिइन् ।

त्यस्तै पुम्सेको भेट्रानतर्फ ४४ वर्षमाथीको ५ डानसम्म नेपालका कोशिस खड्काले स्वर्ण र रोशन खानले रजत पदक हात पारे । कोशिस फाइनलमा इजिप्टका खेलाडीसँग पराजित भएपनि इजिप्टका खेलाडीलाई प्रोटेस्ट लागेपछि आयोजकले कोशिसलाई स्वर्ण पदक जिते निर्णय गरेका थिए ।

सेमिफाइनलमा कोशिससँगै पराजित भएका नेपालका रोशनलाई पनि आयोजकले रजत पदक प्रदान ग¥यो । ४४ वर्षमाथीकै ६ डानको पुम्सेमा नोर्बु लामाले रजत पदक जिते । लामा फाइनलमा इजिप्टका खेलाडीसँग पराजित भएका थिए । ४४ केजीमुनिको तेस्रो डान पुम्सेमा नेपालकै गोपाल श्रेष्ठले रजत पदक जिते । उनी फाइनलमा अमेरिकाका खेलाडीसँग पराजित भएका थिए ।

प्रतियोगिता १८ जुलाईसम्म मुजुमा हुनेछ ।केही खेलाडीले जुलाई २८ देखि १ अगस्टसम्म सिओलमा हुने विश्व तेक्वान्दो हान्मादाङ च्याम्पियनसिपमा समेत खेल्ने राखेपले जनाएको छ ।

रजत विजेता गोपाल श्रेष्ठ र रोशन खान (दायाँ) ।