काठमाडौं क्यान्डिडेट मास्टर भुपेन्द्र निरौलाले १९ औं राष्ट्रिय चेस च्याम्पियनशीपमा आफ्नो एकल अग्रता कायम राखेका छन् । च्याम्पियनशीप अन्र्तगत आईतबार पाचौं तथा छैठौं चरणका खेल सम्पन्न भए ।

पाचौं चरणको खेलमा ललितपुरका ओलम्पियाड खेलाडी सजीन महर्जनमाथि शानदार जीत दर्ज गरेका निरौलाले छैटौं चरणमा नेपाल पुलिस क्लबका पुरुषोतम चौंलागाईंसँग बराबरी खेले । छैटौं चरणको समाप्तिमा भुपेन्द्रको ५ दशमलब ५ अंक भएको छ । सोमबार हुने सातौं चरणको खेलमा भुपेन्द्रले नेपाल आर्मी क्लबका हिमाल लामासँग प्रतिष्पर्धा गर्नेछन् ।

सिवानी एयरलाईन्सको मुख्य प्रायोजन तथा नेपाल निमार्ण व्यवसायी महासंघ र गजुरमुखी निर्माण कम्पनीको सह प्रायोजनमा स्थानीय समिट होटलमा जारी च्याम्पियनशीपमा नेपाल आर्मी क्लबका हिमाल लामा, नेपाल पुलिस क्लबका पुरुषोतम चौंलागाईं तथा ओलम्पियाड खेलाडी सजिन महर्जन समान ४ अंकको साथ अंक तालिकाको दोश्रो स्थानमा रहेका छन् । पाचौं चरणको खेलमा फिडेमास्टर मनिष हमालसँग बराबरी खेलेका हिमालले छैटौं चरणमा पूर्व राष्ट्रिय च्याम्पियन नविन तण्डुकारलाई पराजीत गरे । त्यस्तै सजिनले छैटौं चरणमा क्यान्डिडेटमास्टर रिजेन्द्र राजभण्डारीमाथी जीत दर्ज गरे । पुरुषोतम चौंलागाईंले पाचौं चरणमा फिडेमास्टर सुजेन्द्रप्रसाद श्रेष्ठलाई पराजीत गरे । बर्तमान राष्ट्रिय च्याम्पियन क्यान्डिडेटमास्टर केशव श्रेष्ठ, मनिष हमाल, नविन तण्डुकार, राष्ट्रिय एमेच्योर च्याम्पियन क्षितीज भण्डारी समान चार चार अंकमा रहेका छन् ।

त्यसैगरी फिडेमास्टर विलमलाल श्रेष्ठ, एपिएफ क्लबका सुमित पन्त, ललितपुरका रविन्द्र शाक्य तथा झापाका प्रकाश नेपाल समान ३ दशमलब ५ अंकमा रहेका छन् । उता चौथो महिला बुद्धिचाल प्रतियोगितामा नेशनल बी च्याम्पियन शिन्दिरा जोशीले अग्रता बनाएकी छन् । आईतबार भएको दुबै खेलमा जीत आत्मसात गरेकी शिन्दिराले पाचौंमा वुमन क्यान्डिडेटमास्टर सुरुची थिङ तथा छैटौंमा पूर्व महिला राष्ट्रिय च्याम्पियन वुमन क्यान्डिडेटमास्टर मोनालिसा खम्बुलाई हराईन । शिन्दिराले सोमबार हुने सातौं चरणको खेलमा सुजना लोहनीसँग प्रतिष्पर्धा गर्नेछिन् । एपिएफ क्लबका शान्ता थापा तथा मोनालिसा खम्बु समान ४ दशमलब ५ अंकका साथ अंकतालिकाको दोश्रो स्थानमा रहेका छन् । शान्ताले पाचौं तथा छैटौं चरणमा क्रमशः ओलम्पियाड खेलाडीद्धय संगीता जयसवाल तथा अस्मिता अधिकारीलाई हराईन भने मोनाले पाचौं चरणमा अस्मिता अधिकारीमाथि जीत हात पारिन । नुवाकोटकी सुजना लोहनी तथा काठमाडौंकी अनिशा न्यौपाने समान ४ अंकमा रहेका छन् । त्यसैगरी अस्मिता अधिकारी तथा संगीता जयसवालको समान ३ दशमलब ५ अंक रहेको छ । सुजनाले पाचौं तथा छैटौं चरणमा क्रमशः आभा पुडासैनी तथा राष्ट्रिय च्याम्पियन विना जयसवालमाथि सानदार जीत हासिल गरिन् ।

नेपाल बुद्धिचाल संघको आयोजना तथा ईलाम जिल्ला बुद्धिचाल संघ र गजुरमुखी चेस क्लबको स्थानीय व्यवस्थापनमा भईरहेको च्याम्पियनशीप अन्र्तगत सोमबार सातौं तथा आठौं चरणका खेल हुनेछन् ।