एजेन्सी – फ्रान्सेली क्लब पेरिस सेन्ट जर्मेन (पीएसजी) ले फ्रेन्च लिग वानमा लगातार पाँचौ जित दर्ता गरेको छ । पीएसजीले घरेलु मैदानमा क्लेरमोन्ट फुटमाथि ४–० को फराकिलो जित निकालेको हो ।

पीएसजीको जितमा एन्डर हेरेराले दुई तथा केलियन एमबाप्पे र इड्रिसा गाना गुआईले समान एक गोल गरे । पार्क डेस प्रिन्सेस पेरिसमा शनिबार राति भएको खेलको २०औं मिनेटमा एन्डर हेरेराको गोलबाट पीएसजीले अग्रता लिएको थियो । ३१औं मिनेटमा एन्डर हेरेराले व्यक्तिगत दोस्रो गोल गर्दै पीएसजीलाई पहिलो हाफमा २–० को अग्रता दिलाए ।

५५औं मिनेटमा केलियन एमबाप्पेले गोल गर्दै पीएसजीलाई ३–० ले अघि बढाए । उनले जुलियन ड्राक्सलरको पासमा गोल गरेका थिए । एमबाप्पेले पछिल्लो तेस्रो खेलमा लगातार गोल गरेका हुन् । ६५औं मिनेटमा इड्रिसा गाना गुआईले गोल गर्दै पीएसजीलाई ४–० को फराकिलो जित दिलाए ।

लगातार पाँचौ जितसँगै पीएसजी १५ अंक जोडेर शीर्षस्थानमा यथावत रहेको छ । पीएसजीले दोस्रो स्थानमा रहेको एन्जर्स र मार्सेलाई ५ अंकले पछि पारेको छ । पहिलो हार बेहोरेको क्लेरमोन्ट ८ अंकसहित चौथो स्थानमा रहेको छ ।

यस्तै अर्काे खेलमा लोरिएन्टले लिललाई २–१ ले पराजित गरेको छ । अर्मान्ड र तेरेम माफ्फीले गोल गर्दा लिलका बुराक यिल्माजले एक गोल फर्काए । यो नतिजासँगै लोरिएन्ट ८ अंक जोडेर पाँचौ स्थानमा रहेको छ । पराजित लिल ५ अंक जोडेर १०औं स्थानमा रहेको छ ।

अर्काे खेलमा मार्सेले मोनाकोलाई २–० ले पराजित गरेको छ । मार्सेको जितमा एहमादोउ बाम्वा डिइङले दुवै गोल गरे । जितपछि मार्से ४ खेलबाट १० अंक जोडेर तेस्रो स्थानमा उक्लिएको छ । मोनाको ४ अंकसहित १४औं स्थानमा छ ।