राष्ट्रिय खेलकुद परिषद् (राखेप) ले विवाद समाधान नभएसम्म प्रमुख कार्यकारी अधिकृत भावना घिमिरेलाई स्वतन्त्रपूर्वक नेपाल क्रिकेट संघ (क्यान) को कार्यसञ्चालन गर्न निर्देशन दिएको छ ।

राष्ट्रिय खेलकुद परिषद (राखेप) बाट चतुरबहादुर चन्दको अध्यक्षतामा निर्वाचित कार्यसमितिले मान्यता नपाएको नेपाल क्रिकेट संघ (क्यान) को नवनिर्वाचित कार्यसमितिले विधिसम्मत नभए आफूलाई विघटन गर्न चुनौती दिएको छ ।

प्रमुख कार्यकारी र युवा तथा खेलकुद मन्त्रालयलाई पठाइएको पत्रमा राखेप र अन्तर्राष्ट्रिय संस्थासँग समन्वय गरेर क्यानको सबै दैनिक जिम्मेवारी बहन गर्न घिमिरेलाई निर्देशन दिइएको छ । चतुरबहादुर चन्दको नेतृत्वमा निर्वाचित क्यानको नयाँ कार्यसमितिसँग काम नगर्न भनेको भोलिपल्टै राखेपले घिमिरेलाई उक्त निर्देशन दिएको हो ।

‘नेपालको क्रिकेटमा हामीले हिजो पनि काम गरेका थियौं, आज पनि गरिरहेका छौं र भोली पनि गर्नेछौं,’ मंसिर २८ मध्यरातमा सम्पन्न क्यानको चौथो साधारण सभाबाट महासचिवमा पुनः निर्वाचित भएका अशोकनाथ प्याकुरेलले भने, ‘हामीले विधान सम्मत निर्वाचन गरेको छौं । राखेप हामीलाई अवैधानिक ठान्छ भने विघटन गरेर नयाँ समिति बनाओस । त्यसपछि सबैले आ–आफ्नो बाटो लिनेछन् । विवाद अन्त्य हुनेछ ।’ क्यानको निर्वाचनलाई राखेपले मान्यता नदिइरहेको सन्दर्भमा गरिएको पत्रकार सम्मेलनमा क्यानका अध्यक्ष चन्दले जानाए ।