एजेन्सी – यूएस ओपन कप अन्तर्गत इन्टर मायमी र एफसी सिन्सिनाटिबीच जारी सेमिफाइनल खेल अतिरिक्त समयमा लम्बिएको छ ।

निर्धारित समयको खेल २-२ को बराबरीमा सकिएपछि ३० मिनेट समय थप गरिएको हो । मायमीले दोस्रो हाफको इन्ज्युरी समयको आठौं मिनेटमा बराबरी गोल फर्काउँदै हार टारेको हो ।

यसै साता लिग्स कप जितेको मायमीले यूएस ओपन कपमा भने निकै संघर्ष गर्नुपर्यो । दोस्रो हाफको सुरुवातमा २-० को स्थितिबाट पुनरागमन गर्दै मायमीले खेललाई अतिरीक्त समयमा धकेलेको हो ।

खेलको १८ औं मिनेटमा घरेलु टोली सिन्सिनाटिले अग्रता लियो । लुसियानो अकोस्टाले गोल गर्दै मायमीलाई स्तब्ध पारेका थिए । दोस्रो हाफको ५३ औं मिनेटमा ब्रान्डन भाज्केजले गोल गर्दै २-० को अग्रता दिलाए ।

६८ औं मिनेटमा मायमीका लागि लिओनार्डो काम्पानाले गोल गर्दै खेलमा फर्कने संकेत दिए । लिओनेल मेस्सीको फ्रिकिकमा काम्पानाले हेडरमार्फत सहजै गोल गरेका थिए ।

इन्ज्यूरी समयका लागि थप गरिएको आठौं मिनेटको अन्तिम समयमा मायमीले गोल गर्दै खेललाई अतिरिक्त समयमा लम्ब्यायो । मेस्सीकै लामो पासमा काम्पानाले हेडरमार्फत गोल गरेका थिए ।

यस खेलको विजेताले फाइनलमा ह्युस्टन डाइनामो र रियल साल्ट लेकबीच चलिरहेको दोस्रो सेमिफाइनलको विजेतासँग खेल्नेछ ।