हाङ्गचौ (हाम्रो खेलकुद) – सागका स्वर्ण पदकधारी खेलाडीद्वय वीर बहादुर महरा र निमा घर्ती मगरले १९ औं एसियाली खेलकुदको उद्घाटन समारोहमा नेपालको झन्डा बोक्ने भएका छन् ।

१२ औं र १३ औं दक्षिण एसियाली खेलकुदमा उसुतर्फ स्वर्ण पदक जितेकी निमा र १३ औं सागमा तेक्वान्दोमा स्वर्ण जितेका वीरले उद्घाटन समारोहको मार्च पासमा नेपालको झन्डा बोक्ने भएका हुन् । टोकियो ओलम्पिकदेखि मार्चपासमा महिला र पुरुष दुवैको प्रतिनिधित्व हुनुपर्ने अन्तर्राष्ट्रिय ओलम्पिक समितिले नियम बनाएको थियो । ओलम्पिक काउन्सिल अफ एसियाले पनि त्यसैलाई निरन्तरता दिएको छ ।

नेपालले यसपटक हालसम्मकै सर्वाधिक २ सय ५३ खेलाडीसहित एसियाडमा सहभागिता जनाउँदैछ । २९ खेलका प्रशिक्षक विभिन्न पदाधिकारी पनि चीन आउने क्रम जारी छ ।

उद्घाटन समारोह सुरु नहुँदै पुरुष भलिबल, टेबल टेनिस र महिला फुटबल सुरु भइसकेका छन् । पुरुष भलिबलमा नेपाल समूह चरणको दुवै खेल हार्दै बाहिरिसकेको छ । टेबल टेनिसमा टिम इभेन्टतर्फ शुक्रबार हारे बेहोरेका महिला र पुरुष टोलीले शनिबार विहान पनि खेल्नेछन् ।

महिला फुटबलमा नेपाल शुक्रबार नै भिएतनामसँग २-० ले पराजित भएको हो । टोलीले अझै समूह चरणको दुई खेल सोमबार र विहीबार खेल्नेछ ।