काठमाडौं (हाम्रो खेलकुद) – नेपाल यू-१९ राष्ट्रिय टोलीका ओपनर अर्जुन कुमाल एसीसी यू-१९ प्रिमियर कपको सेमिफाइनलमा जापानविरुद्ध सस्तोमा पेभेलियन फर्केका छन् ।

पछिल्लो खेलमा साउदी अरबविरुद्ध १ सय ४२ रनको सानदार इनिङ खेलेका अर्जुन जापानविरुद्ध भने १० रनमा आउट भए । उनले २३ बलको सामना गर्दै १ चौका प्रहार गरेका थिए । अर्जुन आठौं ओभरको अन्तिम बलमा ठूलो सट खेल्ने धुनमा डिप स्क्वायर लेगमा क्याच आउट हुन पुगे ।

क्रिजमा अहिले ओपनर दीपक बोहोरालाई साथ दिन आकाश त्रिपाठी आएका छन् । दीपक २५ बलमा २ चौकासहित १९ रनमा खेलिरहेका छन् । नेपालले ८ ओभरमा ३२ रन जोड्दै १ विकेट गुमाएको छ ।

टस हारेर पहिला ब्याटिङको निम्तो पाएको नेपालले आजको खेलमा हेमन्त धामीलाई टोलीमा समेटेको छ । मलेसियाको बायोमास ओभलमा जापानका कप्तान कोजी हार्डग्रेभ एबीले टस जितेर पहिला फिल्डिङ गर्ने निर्णय लिएका थिए । नेपालले तीव्र गतिका बलर दुर्गेश गुप्ताको स्थानमा हेमन्तलाई टोलीमा राखेको हो ।

नेपालका लागि ओपनरमा दीपक बोहोरा र अर्जुन कुमाल नै रहेका छन् । त्यसपछि आकाश त्रिपाठी, देव खनाल, दीपक डुम्रे र विशाल विक्रम केसीले मध्यक्रम सम्हाल्नेछन् । मिलन बोहोरासँगै बलरमा दीपेश कँडेल पनि ब्याटिङको क्षमता राख्छन् । सुभाष भण्डारी, आकाश चन्द र हेमन्त धामी बलरको भूमिकामा छन् ।