काठमाडौं (हाम्रो खेलकुद) – काभा मेन्स च्याम्पियन्स लिगमा नेपालको हेल्प नेपाल स्पोर्टस क्लबले पहिलो खेलमा माल्दिभ्सको धिवेही सिफाइन्स क्लबसँग खेल्ने भएको छ ।

सेन्ट्रल एसियन भलिबल एसोसियन (काभा) ले मंगलबार जारी गरेको खेल तालिकामा नेपालको क्लबको पहिलो खेल घरेलु टोली धिवेहीसँग बुधवार परेको हो ।

प्रतियोगितामा काभा अन्तर्गत रहेका ५ देशका लिग च्याम्पियन क्लबको सहभागिता रहेको छ । आयोजक देशको २ क्लबले प्रतिनिधित्व गर्ने नियम रहेको छ । जसअनुसार प्रतियोगितामा काजकिस्तान, किर्गिस्तान, श्रीलंका, नेपाल र माल्दिभ्सका क्लबको सहभागिता रहेको छ ।

प्रतियोगिता सिंगल राउण्ड रोबिनका आधारमा हुनेछ । नेपालमा गत वर्ष भएको यो च्याम्पियनसिपको पहिलो संस्करणमा हेल्प नेपाल फाइनलमा पराजित भएको थियो। यो पटक भने उपाधि जित्ने टोली बनाएको प्रशिक्षक उत्सव खड्काले बताए।

उनले यो पटक तीन उत्कृष्ट विदेशी खेलाडी भित्राएको र विभागीय टिमका खेलाडीलाई समेटेर टिमलाई बलियो बनाएको हाम्रो खेलकुद डटकमलाई बताए।

तर टोलीले नै एकजुट भएर प्रशिक्षण गर्न भने पाएका छैनन्। विदेशी खेलाडी सीधै माल्दिभ्स पुग्नेछन्। यहाँबाट टोली माल्दिभ्स पुगेपछि टिम सेट गर्नको लागि दुई दिनको समय रहनेछ।

उज्वेकिस्तानको क्लबले भने अन्तिम समयमा नाम फिर्ता लिएको थियो। यो प्रतियोगिताको सन् २०२६ को एसियन क्लब च्याम्पियनसिपको छनोट पनि हो। विजेता टोलीले एसियन क्लब च्याम्पियनसिप खेल्न पाउनेछ।

खेल तालिका