एजेन्सी – जर्मन च्याम्पियन बायर्न म्युनिखले यूईएफए च्याम्पियन्स लिग अन्तर्गत तेस्रो क्वाटरफाइनलमा बार्सिलोनाविरुद्ध पहिलो हाफमा नै ४-१ को फराकिलो अग्रता लिएको छ ।

खेलको तेस्रो मिनेटमा नै बायर्नले अग्रता लियो । रोबर्ट लेवान्डोस्की र थोमस मुलरले पेनाल्टी क्षेत्रभित्र एक अर्कासँग पास खेल्दै बनाएको मुभमा मुलरले गोल गरेका थिए । उनले लेवान्डोस्कीले मिलाएको बललाई पहिलो टचमा नै गोल गर्न सफल भए ।

तर बायर्नको उक्त अग्रता ३ मिनेट पानी टिक्न सकेन । छैटौं मिनेटमा जोर्डी अल्बाले गरेको क्रसलाई क्लियर गर्ने क्रममा डेविड अलाबाको क्लियरेन्स आफ्नै पोस्टमा छिर्न पुग्यो । अल्बाले सुआरेजलाई लक्षित गर्दै दिएको लो क्रसमा अलाबाले राम्रो नियन्त्रण गर्न नसक्दा आफ्नो पोस्टतर्फ गएको बललाई गोलरक्षक नोएरले पनि बचाउन सकेनन् ।

खेलको आठौं मिनेटमा लुइस सुआरेजले वन भर्सेस वनको स्थितिमा गरेको प्रहारलाई म्यानुएल नोएरले विफल पारे । त्यसपछि कर्नरमा बनेको मुभमा पोस्ट बाधक बन्दा बार्सिलोना अग्रता लिनबाट चुक्यो । मेस्सीको क्रसमा सर्जियो बुस्केट्सले राम्रोसँग हेडर गर्न नसक्दा बार्सिलोनाको ४ खेलाडीलाई बिट गर्दै बल पोस्टमा लागेर फर्कियो ।

खेलको २० औं मिनेटमा लिओनेल मेस्सीले दुई डिफेन्डरलाई छलाउँदै पेनाल्टी क्षेत्रभित्रबाट गरेको प्रहार गोलरक्षक नोएरले सहजै बचाए । त्यसको एक मिनेट नबित्दै अर्कोतर्फ आक्रमण बुनेको बायर्नले पुन: अग्रता बनायो । इभान पेरिसिचले सर्ज जिनाब्रीको पासलाई पेनाल्टी क्षेत्रभित्र नियन्त्रणमा लिँदै गरेको प्रहार गोलमा परिणत भयो । गोलरक्षक टेर स्टेगनले सट बचाउने प्रयास गरेपनि उनको खुट्टामा लाग्दै बल पोस्टमा छिरेको थियो ।

२७ औं मिनेटमा बायर्नले अग्रता दोब्बर पार्यो । सर्ज जिनाब्रीले गोरेट्जकाको पासलाई सदुपयोग गर्दै पेनाल्टी क्षेत्र भित्रबाट उत्कृष्ट फिनिस गरेपछि बायर्नले ३-१ को अग्रता लियो । लगत्तै लेवान्डोस्कीले बार्सिलोनाको डिफेन्सको गल्तिमा वन भर्सेस वनको स्थिति हुँदापनि गोल गर्न सकेनन् ।

३१ औं मिनेटमा बायर्नले अर्को गोल थप्दै ४-१ को अग्रता बनायो । जोशुआ किम्मिचले दायाँ विंगबाट गरेको क्रसलाई मुलरले ६ यार्ड बक्सभित्रबाट पहिलो टचमा नै गोलरक्षक टेर स्टेगनलाई बिट गर्न सफल भए । ३९ औं मिनेटमा लेवान्डोस्कीको हेडरलाई टेर स्टेगनले सहजै बचाए ।

यस खेलमा जित हासिल गर्ने टोलीले सेमिफाइनलमा म्यानचेस्टर सिटी र लियोनबीच खेलको विजेतासँग प्रतिस्पर्धा गर्नेछ । यसअघि पेरिस सेन्ट जर्मेन (पीएसजी) र आरबी लाइप्जिगले अन्तिम चारमा एक अर्कासँग भिडन्त पक्का गरिसकेका छन् ।