काठमाडौं (हाम्रो खेलकुद) – राष्ट्रिय क्रिकेट टोलीका ब्याटिङ अलराउन्डर आरिफ शेखको घातक बलिङको सहयोगमा नेपाल पुलिस क्लबले प्रधानमन्त्री कप टि२० राष्ट्रिय क्रिकेट प्रतियोगितामा सुदूरपश्चिम प्रदेशमाथि २ रनको रोमान्चक जित हात पारेको छ ।

९४ रनको विजयी लक्ष्य पछ्याएको सुदूरपश्चिमले निर्धारित २० ओभरमा ९ विकेट गुमाउँदै ९१ रन बनायो । अन्तिम ओभरमा ६ रन चाहिएको अवस्थामा करण केसीले चार डट बल राख्दै पुलिसलाई रोमान्चक जित दिलाए । करणले पहिलो बल डट र दोस्रो बलमा हेमन्त धामीलाई एक रन दिए । तेस्रो बल डट राख्दा चौथो बलमा विकाश आग्रीलाई दुई रन दिए । बाँकी दुई बलमा तीन रन चाहिँएको अवस्थामा करणले लगातार डट राख्दै जित पक्का गराए ।

सुदूरपश्चिम प्रदेशका ओपनर गजेन्द्र बोहराले २५ बलमा १ चौका र २ छक्कासहित सर्वाधिक २७ रन बनाए । नारायण जोशीले १५ बलमा २ चौका र २ छक्कासहित २२ रन बनाए । खडक बोहराले ३५ बलमा १ चौकासहित १३ रन बनाए । अन्यले राम्रो प्रदर्शन गर्न सकेनन् । सुदूरका ८ खेलाडीले दोहोरो अंकमा रन बनाउन सकेनन् ।

मध्य गतिका बलर आरिफ शेखले ४ ओभरमा ९ रन खर्चेर ४ विकेट लिए । करण केसी, दीपेन्द्रसिंह ऐरी र पवन सरार्फले १–१ विकेट लिए ।त्यसअघि मुलपानी क्रिकेट मैदानमा टस हारेर ब्याटिङ थालेको पुलिसले निर्धारित २० ओभरमा ८ विकेट गुमाउँदै ९३ रन बनाएको थियो

पुलिसका ओपनर कुशल भुर्तेलले ३८ बलमा १ छक्कासहित सर्वाधिक २१ रन बनाए । नारायणले पुलिसको शीर्षक्रम धरासय बनाएका थिए । ओपनर पवन सरार्फलाई छैटौं ओभरको पाँचौं बलमा नारायणले शेर मल्लबाट २० रनमा क्याच गराउँदै पहिलो सफलता दिलाए ।

पवनले १६ बलमा ४ चौका प्रहार गरे । नारायणले दीपेन्द्रलाई ७ रनमा बोल्ड आउट गरे । १२ औं ओभरको दोस्रो बलमा अनिल शाहलाई पाँच रनमा एलबीडब्लू आउट गरेपछि पुलिस ५८–३ को अवस्थामा पुगेको थियो ।

ओपनर कुशल भुर्तेललाई शेर मल्लले वसन्त कार्कीबाट २१ रनमा क्याच गराए । ३८ बलमा कुशलले १ छक्का प्रहार गरे । त्यसपछि आदित्य महताले पुलिसको मध्यक्रम ध्वस्त बनाएका थिए । आदित्यले दीलिप नाथलाई १, आसिफ शेखलाई १० र अन्जित श्रेष्ठलाई ५ रनमा क्याच गराएपछि पुलिस ८२–८ को अवस्थामा पुगेको थियो ।

ओपनर कुशल भुर्तेल र पवन सरार्फले पहिलो विकेटका लागि ५।५ ओभरमा ३८ रनको सुरुवात दिलाउँदै राम्रो सुरुवात दिलाएका थिए । तर बाँकी ४४ रन जोड्न ८ विकेट गुमाएपछि पुलिस संकटमा पुगेको थियो ।

सुदूरपश्चिमका नारायण जोशीले ४ ओभरमा १८ रन खर्चेर ३ विकेट लिए । आदित्य महताले ३ ओभरमा ९ रन खर्चेर ३ विकेट लिए । शेर मल्लले ४ ओभरमा २५ रन खर्चेर २ विकेट लिए ।

पुलिसले मंगलबार विहान टियु मैदानमा आर्मीसँग खेल्नेछ । पहिलो खेलमा आर्मीले कर्णाली प्रदेशलाई ६३ रनले हराउँदै विजयी सुरुवात गरेको छ । सुदूरपश्चिमले विहीबार कर्णालीसँग खेल्नेछ ।