एजेन्सी – कार्यवाहक कप्तान मोईन अलीको उत्कृष्ट अलराउन्ड प्रर्दशनमा इंग्ल्यान्डले वेस्टइन्डिजलाई चौथो टि२० आई खेलमा ३४ रनले पराजित गरेको छ । योसँगै पाँच टि२० आई खेलको सिरिज २–२ को बराबरी अवस्थामा पुगेको छ ।

१ सय ९४ रनको बलियो विजयी लक्ष्य पछ्याएको वेस्टइन्डिज २० ओभरमा ५ विकेट गुमाउँदै १ सय ५९ रन बनाउन सक्यो । वेस्टइन्डिजका ओपनर काइल मेयर्सले २३ बलमा २ चौका र ४ छक्कासहित ४० रनको सर्वाधिक योगदान दिए ।

ओपनर ब्रेन्डन किंग २६, विकेटकिपर निकोलस पुरन २२ र रोभम्यान पावेल ५ रनमा आउट भए । जेसन होल्डर २४ बलमा २ चौका र ३ छक्कासहित ३६ रनमा आउट भए । काइरन पोलार्ड १८ रनमा अविजित रहे ।

इंग्ल्यान्डकी मोईन अलीले ४ ओभरमा २८ रन खर्चेर २ विकेट लिए । रोस टोपली, आदिल राशिद र लियाम लिभिङस्टोनले १–१ विकेट लिए ।
त्यसअघि टस जितेर ब्याटिङ थालेको इंग्ल्यान्डले निर्धारित २० ओभरमा ६ विकेट गुमाउँदै १ सय ९३ रन बनाएको थियो ।

मोइन अलीले २८ बलमा १ चौका र ७ छक्कासहित ६३ रनको उत्कृष्ट कप्तानी इनिङ खेले । ओपनर जेसन रोय ४२ बलमा ५ चौका र ३ छक्कासहित ५२ रनमा आउट भए ।

टम ब्यान्टन ४, जेम्स भिन्स ३४, लियाम लिभिङस्टोन १६ र साम विलिंग्सले १३ रन बनाए । वेस्टइन्डिजका जेसन होल्डरले ४ ओभरमा ४४ रन खर्चेर ३ विकेट लिए । पाँचौं तथा निर्णायक खेल सोमबार विहान हुनेछ ।