एजेन्सी – वेस्टइन्डिजमा जारी यू–१९ विश्वकपको सेमिफाइनल समिकरण पूरा भएको छ । चौथो तथा अन्तिम क्वाटरफाइनलमा भारतले साविक विजेता बंगलादेशलाई ५ विकेटले हराएसँगै सेमिफाइनल समिकरण पूरा भएको हो ।

सेमिफाइनलमा अष्ट्रेलिया, भारत, अफगानिस्तान र इंग्ल्यान्ड गरि चार टोलीले स्थान बनाएका छन् । पहिलो सेमिफाइनलमा मंगलबार इंग्ल्यान्ड र अफगानिस्तानबीच प्रतिस्पर्धा हुनेछ । बुधबार दोस्रो सेमिफाइनलमा भारत र अष्ट्रेलियाबीच प्रतिस्पर्धा हुनेछ । पहिलो क्वाटरफाइनलमा इंग्ल्यान्डले दक्षिण अफ्रिकामाथि ६ विकेटको सानदार जितका साथ सेमिफाइनलमा स्थान पक्का गर्यो ।

दोस्रो क्वाटरफाइनलमा श्रीलंकालाई चार रनले स्तब्ध पार्दै अफगानिस्तानले सेमिफाइनलमा स्थान बनाएको हो । अफगानिस्तान पहिलो पटक फाइनल खेल्ने सोचमा हुनेछ । तेस्रो क्वाटरफाइनलमा अष्ट्रेलियाले पाकिस्तानलाई १ सय १९ रनको फराकिलो अन्तरले हराउँदै सहजै सेमिफाइनलमा स्थान बनायो । चौथो तथा अन्तिम क्वाटरफाइनलमा भारतले बंगलादेशलाई हराउँदै सेमिफाइनलमा स्थान बनाएको हो ।

भारत यू–१९ विश्वकपमा सर्वाधिक सफल टोली हो । भारतले २०००, २००८, २०१२ र २०१८ मा गरि चार पटक यू–१९ विश्वकप उपाधि जितेको छ । त्यसपछि अष्ट्रेलिया १९८८, २००२ र २०१० मा यू–१९ विश्पकप च्याम्पियन बनेको थियो । पाकिस्तानले २००४ र २००६ मा लगातार यू–१९ विश्वकपकको उपाधि जितेको थियो । बंगलादेश, दक्षिण अफ्रिका, वेस्टइन्डिज र इंग्ल्यान्डले एक एक पटक यू–१९ विश्वकपको उपाधि जितेका छन् ।