एजेन्सी – मध्य गतिका बलर जेसन होल्डरको कीर्तिमानी ह्याट्रिकको सहयोगमा वेस्टइन्डिजले इंग्ल्यान्डसँग पाँच टि२० आई खेलको सिरिज ३–२ ले जितेको छ । सोमबार विहान पाँचौं तथा अन्तिम खेलमा होल्डरले लगातार चार बलमा चार विकेट लिएसँगै वेस्टइन्डिजले इंग्ल्यान्डलाई १७ रनले हराउँदै सिरिज जितेको हो ।

१ सय ८० रनको विजयी लक्ष्य पछ्याएको इंग्ल्यान्ड १९.५ ओभरमा १ सय ६२ रनमा अल आउट भयो । इंग्ल्यान्डका जेम्स भिन्सले ३५ बलमा ७ चौका र १ छक्कासहित सर्वाधिक ५५ रन बनाए । इंग्ल्यान्डलाई जितको लागि अन्तिम ६ बलमा २० रन चाहिँएको थियो । पहिलो बलमा होल्डरले नो बल सहित दुई रन दिए । अर्को बल डट राखे । त्यसपछि होल्डरले लगातार चार विकेट लिँदै जित पक्का गराए ।

दोस्रो बलमा क्रिस जोर्डनलाई वैकल्पिक फिल्डर हेडेन वाल्श जुनियरबाट ७ रनमा क्याच गराए । तेस्रो बलमा साम विलिंग्स डिप मिडविकेटमा वाल्शबाटनै ४१ रनमा क्याच आउट भए । चौथो बलमा आदिल राशिदलाई क्याच गराउँदै वेस्टइन्डिजबाट टि२० आईमा ह्याट्रिक लिने होल्डर पहिलो खेलाडी बने ।

पाँचौं बलमा होल्डरले सकिब मोहम्मदलाई बोल्ड गर्दै लगातार चार बलमा चार विकेट लिएका थिए । टि२० आई इतिहासमा लगातार चार विकेट लिने उनी चौथो बलर हुन् । यसअघि अफगानिस्तानका राशिद खान, श्रीलंका लासिथ मलिङ्गा र आयरल्यान्डका कर्टिस क्याम्फरले लगातार चार विकेट लिएका थिए ।

विलिंग्सले २८ बलमा १ चौका र २ छक्कासहित ४१ रनमा आउट भए । ओपनर जेसन रोय ८ र टम ब्यान्टन १६ रनमा आउट भए । मोईन अली १४, लियाम लिभिङस्टोन ६ र फिल साल्ट ३ रनमा आउट भए । होल्डरले २.५ ओभरमा ५ विकेट लिए । स्पिनर अकिल हुसैनले ४ ओभरमा ३० रन खर्चेर ४ विकेट लिए ।

त्यसअघि टस जितेर पहिला ब्याटिङ थालेको वेस्टइन्डिजले निर्धारित २० ओभरमा ४ विकेट गुमाउँदै १ सय ७९ रन बनायो । कप्तान काइरन पोलार्डले २५ बलमा १ चौका र २ छक्का प्रहार गर्दै ४१ रनमा अविजित रहे ।

रोभम्यान पावेल १७ बलमा १ चौका र ४ छक्कासहित ३५ रनमा अविजित रहे । ओपनर ब्रेन्डन किङ ३१ बलमा २ चौका र २ छक्कासहित ३४ रनमा आउट भए । अर्का ओपनर काइल मेयर्स १९ बलमा ३ चौका र २ छक्कासहित ३१ रनमा आउट भए । रोमारियो शेफर्ड ६ र निकोलस पुरन २१ रनमा आउट भए ।

इंग्ल्यान्डका स्पिनर आदिल राशिद र लियाम लिभिङस्टोनले २–२ विकेट लिए । वेस्टइन्डिज पहिलो खेलमा ९ विकेटले विजयी हुँदा दोस्रो खेलमा १ रनले पराजित भएको थियो । तेस्रो खेलमा वेस्टइन्डिज २० रनले विजयी हुँदा चौथो खेलमा ३४ रनले पराजित भएको थियो । ३७ रन बनाउनुको साथै १५ विकेट लिएका होल्डर खेलको प्लेयर अफ द सिरिज र म्याच दुवै चुनिए ।

वेस्टइन्डिजले अव तीन ओडिआई र तीन टि२० आई सिरिजको लागि भारत भ्रमण गर्नेछ । पहिलो ओडिआई ६ फेब्रुअरीमा हुनेछ । इंग्ल्यान्डले मार्चमा वेस्टइन्डिजसँग तीन टेस्ट सिरिज खेल्ने कार्यक्रम छ ।