एजेन्सी – इन्डियन प्रिमियर लिग (आइपिएल) २०२२ को मेगा अक्सनको लागि नेपालबाट सन्दीप लामिछाने मात्र छनोट भएका छन् । नेपालबाट १५ खेलाडीले अक्सनमा नाम दर्ता गराएपनि सन्दीपमात्र मेगा अक्सनको लागि छनोट भएका हुन् ।

सन्दीप बाहेक नेपालबाट आसिफ शेख, पवन सरार्फ, सन्दीप जोरा, कुशल भुर्तेल, रोहित कुमार पौडेल, सुशान भारी, आरिफ शेख, अभिनाश बोहरा, विनोद भण्डारी, शरद भेषावकर, कुशल मल्ल, करण केसी, सोमपाल कामी र दीपेन्द्रसिंह ऐरीले नाम दर्ता गराएका थिए ।

२०२० को अक्सनमा दीपेन्द्रसिंह ऐरी, विकेटकिपर विनोद भण्डारी, अलराउन्डर करण केसी, सोमपाल कामी, स्पिनर सन्दीप लामिछाने, कुशल मल्ल, ब्याट्सम्यान शरद भेषावकर र अभिनास बोहराले नाम दर्ता गराएपनि अक्सनमा गएका थिएनन् । अक्सनमा नाम दर्ता सम्बन्धित क्रिकेट बोर्डमार्फत हुने गर्दछ । तर सर्ट लिष्टमा परेमात्र अक्सनमा जाने गर्दछन् ।

सन्दीपले आफ्नो न्यूनतम मूल्य ४० लाख भारु (६४ लाख नेपाली रुपैयाँ) तोकेका छन् । सन्दीपलाई अक्सनमा कुनै टोलीले मूल्य लगाएको खण्डमा कम्तीमा ४० लाख भारु पाउने निश्चित हुनेछ । २०२१ मा सन्दीपले ४० लाख भारुनै अक्सनमा राखेपनि विक्न सकेका थिएनन् ।

सन्दीपलाई २०१८ मा तत्कालिन दिल्ली डेयर डेभिल्स (दिल्ली क्यापिटल्स) न्यूनतम मूल्य २० लाख भारुमा अनुबन्ध गरेको थियो । त्यससिजनमा दिल्ली लिगबाट बाहिरिएपछि अन्तिम तीन खेल खेल्दै ५ विकेट लिएका थिए ।

२०१९ मा दिल्लीले ६ खेलमा मौका दिँदा सन्दीपले ८ विकेट लिएका थिए । २०२० मा भने सन्दीपले मौका पाएनन् । २०२१ मा विक्न सकेनन् ।मेगा अक्सनमा कुल १ हजार २ सय १४ खेलाडीले नाम दर्ता गराएपनि सर्ट लिष्टमा ५ सय ९० खेलाडी मात्र परेका छन् । ३ सय ५५ अन क्याप्ड छन् । ३ सय ७० भारतीय र २ सय २० विदेशी खेलाडी छन् ।

अष्ट्रेलियाबाट ४७, अफगानिस्तानबाट १७, बंगलादेशबाट ५, इंग्ल्यान्डबाट २४, आयरल्यान्डबाट ५, न्युजिल्यान्डबाट २४, दक्षिण अफ्रिकाबाट ३३, श्रीलंकाबाट २३, वेस्टइन्डिजबाट ३४ र जिम्बावेबाट १ खेलाडी अक्सनमा सहभागी हुनेछन् । नामिबियाबाट ३, स्कटल्यान्डबाट २, नेपाल र अमेरिकाबाट १-१ खेलाडी छन् ।

१० टोलीले रिटेन मार्फत ३३ खेलाडी टोलीमा अनुबन्ध गरि सकेका छन् । आइपिएल अक्सन फेब्रुअरी १२ र १३ मा बेंगलोरमा हुने छ। यस सिजनदेखि आइपिएलमा १० टोलीको सहभागीता रहने छ ।

एक टोलीले बढीमा २५ खेलाडी राख्न पाउनेछन् । जसमा ८ विदेशी खेलाडी हुने छन् । १० विदेशी खेलाडी रिटेन भई सकेको अवस्थामा अव ७० विदेशी खेलाडी आइपिएल अक्सनमा विक्नेछन् । १० टोली हुँदा सन्दीपको सम्भावना छ ।