एजेन्सी – इंग्ल्यान्डले रोमान्चक र उच्च प्रतिस्पर्धात्मक पहिलो सेमिफाइनल खेलमा अफगानिस्तानलाई हराउँदै २४ वर्षपछि यू-१९ विश्वकपको फाइनलमा पुगेको छ । वेस्टइन्डिजमा जारी यू-१९ विश्वकपको पहिलो सेमिफाइनलमा इंग्ल्यान्डले अफगानिस्तानलाई १५ रनले हराउँदै दोस्रो पटक फाइनलमा स्थान बनाएको छ । इंग्ल्यान्डले फाइनलको खडेरी पनि तोडेको छ ।

डकवर्थ लेविस पद्धतिको आधारमा २ सय ३१ रनको विजयी लक्ष्य पछ्याएको अफगानिस्तानले निर्धारित ४७ ओभरमा ९ विकेट गुमाउँदै २ सय १५ रन बनायो । अफगानिस्तानका अल्लाह नुरले ८७ बलमा ३ चौकार ३ छक्कासहित सर्वाधिक ६० रनको योगदान दिए । अफगानिस्तानलाई अन्तिम १२ बलमा जितको लागि १८ रन आवश्यक हुँदा हातमा ४ विकेट थियो । तर स्पिनर रेहान अहमदले तीन विकेट लिँदै एक रन मात्र खर्चेपछि अफगानिस्तानको पहिलो पटक फाइनल पुग्ने सम्भावना टाढिएको थियो ।

४६ औं ओभरको पहिलो बलमा नुर अहमदको क्याच ३० यार्ड सर्कलमा एलेक्स रेवले उत्कृष्ट क्याच लिएपछि इंग्ल्यान्डको आशा बलियो बनेको थियो । ओपनर नङ्गेलिया खरोटेलाई तेस्रो बलमै शून्यमै गुमाएपनि दोस्रो विकेटका लागि मोहम्मद ईशाक अल्लाह नुरल् ९३ रनको उत्कृष्ट साझेदारी गरेपछि एक समय अफगानिस्तान सहज जिततर्फ अघि बढेको थियो । तर मध्यक्रम धरासय बनेपछि इतिहास रच्न चुक्यो ।

मोहम्मद ईशाक ६५ बलमा ३ चौका र २ छक्कासहित ४३ रनमा रन आउट भए । अब्दुल हादी ६० बलमा १ चौका र १ छक्कासहित ३७ रनमा अविजित रहे । विवाल अहमद ३४ बलमा ६ चौकासहित ३३ र नुर अहमद २५ रनमा आउट भए । अन्य कुनैपनि ब्याटरले राम्रो प्रदर्शन गर्न सकेनन् । इंग्ल्यान्डका रेहान अहमदले ६ ओभरमा ४१ रन खर्चेर ४ विकेट लिए । थोमस एस्पिनवालले २ विकेट लिए ।

त्यसअघि सर भिभियन रिचर्ड्स स्टेडियम नर्थ साउन्ड एन्टिगुआमा टस जितेर पहिला ब्याटिङ थालेको इंग्ल्यान्डले निर्धारित ४७ ओभरमा ६ विकेट गुमाउँदै २ सय ३१ रन बनायो । इंग्ल्यान्डका युवा स्टार जर्ज बेलले ६७ बलमा ६ चौकासहित ५६ रनको अविजित इनिङ खेल्दै प्लेयर अफ द म्याच चुनिए ।

एक समय ३५.१ ओभरमा १३६–६ को कमजोर अवस्थामा पुगेको इंग्ल्यान्डलाई सातौं विकेटका लागि बेल र विकेटकिपर एलेक्स होर्टनले ९५ रनको उत्कृष्ट अविजित साझेदारीका साथ प्रतिस्पर्धात्मक योगफल तयार पारेका थिए । होर्टनले ३६ बलमा ५ चौका र १ छक्कासहित ५३ रनको आक्रामक इनिङ खेले । उनले अन्तिम ओभरमा नविद जद्रानलाई दुई चौका र एक छक्कासहित महत्वपूर्ण १९ रन जोडेका थिए ।

ओपनर जर्ज थोमस ६९ बलमा ४ चौका र २ छक्कासहित ५० रनमा आउट भए । जेम्स रेव १२ र कप्तान टम पस्र्टले १७ रन जोडे ।
अफगानिस्तानका युवा स्टार नुर अहमदले र नविद जद्रानले २–२ विकेट लिए ।

इंग्ल्यान्डले सन् १९९८ को यू१९ विश्वकपको फाइनलमा न्युजिल्यान्डलाई ७ विकेटले हराउँदै उपाधि जितेको थियो । त्यसयता इंग्ल्यान्डले यू-१९ विश्वकपको फाइनलमा स्थान बनाउन सकेको थिएन । दोस्रो सेमिफाइनलमा आज भारत र अष्ट्रेलियाबची प्रतिस्पर्धा हुनेछ । यू-१९ विश्ककपका सर्वाधिक सफल यी दुई टोलीबीच कडा प्रतिस्पर्धा हुने अनुमान गरिएको छ । फाइनल शनिबार हुनेछ ।