एजेन्सी – कप्तान यश धुल र शेख रशिदको उत्कृष्ट दोहोरो शतकीय साझेदारीको सहयोगमा भारत वेस्टइन्डिजमा जारी यू–१९ विश्वकपको फाइनलमा पुगेको छ । भारतले दोस्रो सेमिफाइनल खेलमा अष्ट्रेलियालाई ९६ रनले हराउँदै आठौं पटक यू–१९ विश्वकपको फाइनलमा स्थान पक्का बनाएको हो । भारतले उपाधिको लागि शनिबार इंग्ल्यान्डसँग खेल्नेछ ।

२ सय ९१ रनको विजयी लक्ष्य पछ्याएको अष्ट्रेलिया ४१.५ ओभरमा १ सय ९४ रनमा अल आउट भयो । अष्ट्रेलिया मध्यक्रमका ब्याटर लचलान शाले ६६ बलमा ४ चौकासहित सर्वाधिक ५१ रन बनाए । कोरे मिलर ३८, क्याम्पबेल केल्लावेले ३०, ज्याक सिनफिल्ड २० र टम ह्टनीले १९ रन बनाए । भारतका अफस्पिनर विक्की ओस्टलले सर्वाधिक तीन विकेट लिए । निशान्त सिन्धु र रवि कुमारले २–२ विकेट लिए ।

त्यसअघि कुलिज क्रिकेट ग्राउन्ड एन्टिगुवामा टस जितेर पहिला ब्याटिङ रोजेको भारतले निर्धारित ५० ओभरमा ५ विकेट गुमाउँदै २ सय ९० रन बनाएको थियो । भारतका कप्तान यश धुलले १ सय १० बलमा १० चौका र १ छक्कासहित १ सय १० रनको शतकीय इनिङ खेले । शेख राशिद १ सय ८ बलमा ८ चौका र १ छक्कासहित ९४ रनमा आउट भए ।

कमजोर सुरुवात गरेको भारतलाई तेस्रो विकेटका लागि शेख रशिद र यस धुलले २ सय ४ रनको उत्कृष्ट दोहोरो शतकीय साझेदारीका साथ बलियो अवस्थामा पुर्याएका थिए । विकेटकिपर दिनेश बना ४ बलमा २ चौका र २ छक्कासहित २० रनमा अविजित रहे ।

भारतले सुरुवाती २५ ओभरमा भारतले ८६ रन मात्र बनाएको थियो । अन्तिम २५ ओभरमा भारतले २ सय ४ रन जोडेको थियो । अन्तिम १० ओभरमा भारतले १ सय ८ रन बनाएको थियो । अष्ट्रेलिया ज्याक निस्वेट र विलियम साल्जम्यानले २–२ विकेट लिए ।

पहिलो सेमिफाइनलमा इंग्ल्यान्डले अफगानिस्तानलाई १५ रनले हराउँदै फाइनलमा स्थान बनाएको छ । इंग्ल्यान्ड दोस्रो र भारत पाँचौं पटक उपाधि जित्ने सोचमा हुनेछन् । इंग्ल्यान्डले सन् १९९८ मा न्युजिल्यान्डलाई ७ विकेटले हराउँदै पहिलो पटक उपाधि जितेको थियो ।

त्यसपछि इंग्ल्यान्ड पहिलो पटक फाइनलमा पुगेको हो । भारत २०००, २००८, २०१२ र २०१८ यू१९ विश्वकप च्याम्पियन टोली हो । २००६, २०१६ र २०२० मा उपविजेता बनेको थियो । फाइनल सर भिभियन रिचर्ड्स स्टेडियममा शनिबार हुनेछ ।