एजेन्सी – क्यानडाले आइसिसी टि२० विश्वकप ग्लोबल छनोट ए खेल्ने १४ सदस्य टोली घोषणा गरेको छ । नेपालको समूह बी मा रहेको क्यानडाले नवनित धालिवालको कप्तानीमा बलियो टोली घोषणा गरेको छ । क्यानडाको टोलीमा वेस्टइन्डिज मूलका अलराउन्डर रयान खान पठान र पूर्व पाकिस्तानी तीव्र गतिका बायाँ हाते बलर कलिम सना लगायतका खेलाडी छन् ।

क्यारेवियन प्रिमियर लिग (सिपिएल) मा राम्रो प्रभाव जमाउँदै आएका बायाँ हाते स्पिनर साद जफर टोलीमा छन् । पाकिस्तानी मुलका जफरले १७ टि२० आईमा २४ विकेट लिएका छन् । २०१९ मा आयरल्यान्डलाई हराउन उनले दुई महत्वपूर्ण विकेट लिएका थिए । त्यस्तै २००९ मा पाकिस्तानको यू१९ टोलीबाट खेलेका कलिम पनि क्यानडाको टोलीमा छन् ।

उनी टि२० आईमा डेब्यू गर्ने छन् । पठानले गत असोजमा एभरेष्ट प्रिमियर लिग (इपिएल) विराटनगर किंग्सबाट खेलेका थिए । उनी आक्रामक ब्याटिङका लागि चिनिन्छन् । गत नोभेम्बरमा पनामाविरुद्ध शतकीय इनिङ खेलेका थिए । पठानले आक्रामक ब्याटिङसँगै मध्यगतिमा बलिङ गर्ने गर्दछन् ।

क्यानडाका कप्तान नवनित र विकेटकिपर हम्जा तारिक प्रमुख र भरपर्दा ब्याटर हुन् । २०१९ को टि२० विश्वकप ग्लोबल छनोटमा क्यानडाले टेस्ट टोली आयरल्यान्डलाई १० रनले हराएको थियो । उक्त खेलमा कप्तान नवनितले ५१ बलमा ६९ रनको महत्वपूर्ण इनिङ खेलेका थिए । उनी नेपालविरुद्ध घातक बन्नसक्छन् । क्यानडा शीर्षक्रमका ब्याटर नितिश कुमार भने छैनन् ।

क्यानडा, नेपाल, ओमान र फिलिपिन्स समूह बी मा छन् । समूह ए मा आयरल्यान्ड, युएई, जमर्नी र बहराइन छन् । शीर्ष दुई टोली सेमिफाइनलमा पुग्नेछन् । फाइनल पुग्ने दुई टोलीले अक्टोबर नोभेम्बरमा अष्ट्रेलियामा हुने टि२० विश्वकप खेल्न पाउने छन् । क्यानडालाई विश्वकप खेल्न ओमान वा नेपाल मध्य एकलाई पछि पार्दै सेमिफाइनल खेल्नुपर्ने हुन्छ । क्यानडाले १८ फेब्रुअरीमा फिलिफिन्ससँग खेल्नेछ । १९ फेब्रुअरीमा ओमान र २१ फेब्रुअरीमा नेपालसँग खेल्नेछ ।

क्यानडाको टोली –

नवनित धालिवाल (कप्तान), डिलोन हेलिगर, ऋषिभ जोशी, जतिन्द्र मथारु, श्रेयस मुवा, सलमान नजार, रयान पठान, कलिम सना, जुनैद सद्दिक, रविन्द्रपाल सिंह, म्याथ्यु स्पोर्स, हम्जा तारिक (विकेटकिपर), हर्ष ठाकर र साद जफर ।