एजेन्सी – ओपनर तथा विकेटकिपर हसिबउल्लाह खान र कप्तान कसिम अक्रमको सानदार शतकसँगै पाकिस्तानले श्रीलंकामाथि विशाल जितका साथ यू–१९ विश्वकप २०२२ मा पाँचौं स्थानमा रहेर अन्त्य गरेको छ । वेस्टइन्डिजमा जारी यू–१९ विश्वकपमा पाकिस्तानले पाँचौं स्थानको लागि भएको खेलमा श्रीलंकालाई २ सय ३८ रनको फराकिलो अन्तरले पराजित गर्यो ।

सर भिभियन रिचर्ड्स स्टेडियममा टस हारेर ब्याटिङ थालेको पाकिस्तानले निर्धारित ५० ओभरमा ३ विकेट गुमाउँदै ३ सय ६५ रन बनायो । कप्तान कसिम अक्रम ८० बलमा १३ चौकार ६ छक्कासहित १ सय ३५ रनको विष्फोटक शतकीय इनिङ खेले । बलिङतर्फ उनले पाँच विकेट लिँदै सहज जित दिलाए ।

यू–१९ विश्वकप इतिहासमा उनी एकै खेलमा शतक र पाँच विकेट लिने पहिलो खेलाडी दुलर्भ कीर्तिमान रचेका छन् । विकेटकिपर खानले १ सय ५१ बलमा ९ चौका र २ छक्कासहित १ सय ३६ रनको शतकीय इनिङ खेले । अर्का ओपनर मुहम्मद शाहजाद ६९ बलमा ७ चौका र २ छक्कासहित ७३ रनमा आउट भए ।

ओपनर शाहजाद र खानले पहिलो विकेटका लागि २४.१ ओभरमा १ सय ३४ रनको उत्कृष्ट शतकीय साझेदारी गरेका थिए । दोस्रो विकेटका लागि खान र अक्रमले २ सय २९ रनको सानदार दोहोरो शतकीय साझेदारी गरेका थिए । श्रीलंका मथिशा पाथिरानाले २ विकेट लिए ।
३ सय ६६ रनको विशाल विजयी लक्ष्य पछ्याएको श्रीलंका ३४.२ ओभरमा १ सय २७ रनमा अल आउट भयो ।

श्रीलंका तल्लोक्रमका विनुजा रणपुल ५८ बलमा ५ चौका र २ छक्कासहित सर्वाधिक ५१ रनमा अविजित रहे । कप्तान दिनुथ ४० रनमा आउट भए । अन्य ८ खेलाडीले दोहोरो अंकमा रन बनाउन सकेनन् । विष्फोटक शतक प्रहार गरेका अफस्पिनर अक्रमले १० ओभरमा ३७ रन खर्चेर ५ विकेट लिँदै इतिहास रचे ।

पाकिस्तान क्वाटरफाइनलमा अष्ट्रेलियासँग १ सय १९ रनले पराजित भएको थियो । श्रीलंका क्वाटरफाइनलमा अफगानिस्तानसँग ४ रनले पराजित हुँदै बाहिरिएको थियो ।

उपाधिको लागि शनिबार इंग्ल्यान्ड र भारत भिड्नेछन् । सेमिफाइनलमा भारतले अष्ट्रेलियालाई ९६ रन र इंग्ल्यान्डले अफगानिस्तानलाई १५ रनले हराउँदै फाइनलमा स्थान बनाएका हुन् । भारत पाँचौं र इंग्ल्यान्ड दोस्रो पटक उपाधिको सोचमा हुनेछन् ।