एजेन्सी – जिम्बावेमा जारी आइसिसी टि२० विश्वकप छनोट बी को सेमिफाइनल समिकरण पूरा भएको छ । सेमिफाइनलमा अमेरिका, जिम्बावे, नेदरल्यान्ड्स र पपुवा न्युगिनी पुगेका छन् ।

समूह ए बाट जिम्बावे विजेता र अमेरिका उपविजेताको रुपमा सेमिफाइनलमा पुगे । समूह बी बाट नेदरल्यान्ड्स समूह विजेता र पपुवा न्युगिनी उपविजेताको रुपमा सेमिफाइनमा स्थान बनाएका हुन् ।

पहिलो सेमिफाइनलमा जिम्बावे र पपुवा न्युगिनीबीच प्रतिस्पर्धा हुनेछ । दोस्रो सेमिफाइनलमा अमेरिका र नेदरल्यान्ड्सबीच प्रतिस्पर्धा हुनेछ । दुबै सेमिफाइनल आज हुनेछ । फाइनलमा पुग्ने दुई टोलीले आगमी अक्टोबर नोभेम्बरमा अष्ट्रेलियामा हुने टि२० विश्वकप खेल्न पाउनेछन् । अमेरिका पहिलो पटक विश्वकप खेल्ने लक्ष्यमा हुनेछ ।

जिम्बावे र नेदरल्यान्ड्स अपराजित रहे । पपुवा न्युगिनी भने भाग्यशाली रह्यो । अन्तिम खेलमा हङकङसँग २ विकेटले पराजित भएपनि नेटरनरेटका कारण सेमिफाइनलमा स्थान बनायो । समान २ अंक भएपनि पपुवा न्युगिनीको माइनस ०.४१९ र हङकङको माइनस ०.९८९ रह्यो ।

हङकङ युगान्डासँग २ विकेट र नेदरल्यान्ड्ससँग ७ विकेटले पराजित भएको थियो । पपुवा न्युगिनीले नेदरल्यान्ड्सँग ५२ रनले हार्दा युगान्डालाई ८ विकेटले हराएको थियो ।

जिम्बावेले सिंगापुरलाई १ सय ११, जर्सीलाई २३ रन र अमेरिकालाई ४६ रनले हराएको थियो । अमेरिकाले जर्सीलाई ८ विकेट र सिंगापुरलाई १ सय ३२ रनले हराएको थियो ।

अंक तालिका

समूह ए मा जिम्बावे ३ खेलमा ६ अंकका साथ शीर्ष स्थानमा रह्यो । अमेरिका ३ खेलमा २ मा जित र १ मा हार सहित ४ अंकका साथ दोस्रो स्थानमा रह्यो । समान खेलमा जर्सी २ मा हार र १ मा जितका साथ तेस्रो र सिंगापुर जित बिहीन हुँदै पुछारमा रहेर बाहिरिए ।

समूह बी मा नेदरल्यान्ड्स ६ अंकका साथ शीर्ष स्थानमा रह्यो । समान २ अंक भएपनि पपुवा न्युगिनी दोस्रो र हङकङ तेस्रो स्थानमा रह्यो । युगान्डा पनि २ अंकका साथ पुछारमा रहेर बाहिरियो ।