काठमाडौं (हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिजमा नामिबियाले प्रस्तुत गरेको मध्यम विजयी लक्ष्य पछ्याउनेक्रममा उपकप्तान रोहित पौडेलको विकेटसँगै नेपाल समस्यामा परेको छ ।

जितको लागि २ सय रनको विजयी लक्ष्य पछ्याएको नेपालले २१ ओभरमा ४ विकेट गुमाउँदै ७७ रन बनाएको छ । क्रिजमा दीपेन्द्रसिंह ऐरी २२ बलमा २ चौकासहित १५ रनमा अविजित छन् । उनलाई आरिफ शेखले ३ रनमा साथ दिएका छन् ।

तीव्र गतिका बलर ज्यान फिंलिकको पहिलो ओभरको चौथो बलमा ओपनर कुशल भुर्तेल शून्यमा रुबेन ट्रम्पलम्यानबाट क्याच भए । फ्रिंलिककै पाँचौं ओभरको तेस्रो बलमा देव खनाल डिप मिडविकेटमा बेन सिकोन्गोबाट १ रनमा क्याच आउट भए ।

आसिफ शेख स्पिनर बेर्नार्ड शोल्ट्जको १४ औं ओभरको दोस्रो बलमा डिप एक्स्ट्रा कभरमा कप्तान जेहार्ड एरास्मसबाट ३४ रनमा क्याच भए । उनले ३२ बलमा ६ चौका प्रहार गरे । बेर्नार्डको १९ औं ओभरको चौथो बलमा रोहित कटविहाइन्ड १७ रनमा आउट भए । रोहितले ५० बल खेलेका थिए । रोहित अम्पायरको निर्णयमा भने सन्तुष्ट थिएनन् ।

त्यसअघि कम्बसदुन न्यू ग्राउन्ड, एयरमा टस जितेर पहिला ब्याटिङ थालेको नामिबिया ४९.२ ओभरमा १ सय ९९ रनमा अल आउट भयो । नामिबियाका कप्तान जेहार्ड एरास्मस ७० बलमा ४ चौका र १ छक्कासहित सर्वाधिक ५३ रन बनाए ।

खराब सुरुवात गरेपनि चौथो विकेटका लागि एरास्मस र जान निकोल लोफ्टी इटनले ६८ रनको साझेदारी गर्दै नामिबियालाई खेलमा फर्काएका थिए ।

नेपालका कप्तान सन्दीप लामिछानेले १० ओभरमा २ मेडन राख्दै २९ रन खर्चेर ४ विकेट लिए । सोमपाल कामीले १० ओभरमा ३३ रन खर्चेर २ विकेट लिए । दीपेन्द्रसिंह ऐरीले ३.२ ओभरमा ९ रन खर्चेर २ विकेट लिए । बसिर अहमदले ९ ओभरमा ४९ रन खर्चेर १ विकेट लिए ।