काठमाडौं (हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिजमा घरेलु टोली स्कटल्यान्डसँग नेपालले टोलीमा तीन परिवर्तन गरेको छ । टिटवुड ग्लासगोमा स्कटल्यान्डका कप्तान रिची बेरिङ्टनले टस जितेर पहिला फिल्डिङ गर्ने निर्णय लिएका हुन् ।

नेपालले पवन सरार्फको स्थानमा करण केसीलाई टोलीमा फर्काएको छ । करणलाई नेपालले नामिबियाविरुद्ध विश्राम दिएको थियो । बसिर अहमदलाई नेपालले बेन्चमा राख्दै किशोर महतोलाई डेब्यू दिएको छ । आदिल अन्सारीको स्थानमा विनोद भण्डारीले मौका पाएका छन् ।

किशोरले लामो समयको प्रतिक्षापछि डेब्यू गरेका हुन् । किशोरले गत मे मा जिम्बावे ए विरुद्ध अभ्यास खेलमा ५ विकेट लिएका थिए । त्यो अभ्यास खेल हुँदा आधिकारीक रुपमा ओडिआई मार्फत डेब्यू गरेका छन् ।किशोर तीव्र गतिसँगै तल्लोक्रममा राम्रो ब्याटिङ गर्ने गर्दछन् । बसिरले नामिबियासँग ९ ओभरमा ४९ रन खर्चेर १ विकेट लिएका थिए ।

स्कटल्यान्डविरुद्ध मात्र २ ओभर गरेका थिए । एउटा प्रमुख बलरलाई दुई ओभर गराएर राख्न भन्दा अर्को तीव्र गतिको बलर खेलाउन उपयुक्त हुन्छ । बसिरको विकल्पमा किशोर महतोले मौका पाएका हुन् । नेपालले स्कटल्यान्डलाई यसै मैदानमा सस्तैमा अल आउट गर्न तीव्र गतिका बलरले उच्च प्रदर्शन गरेका थिए । ब्याटिङ कमजोरको कारण विनोद भण्डारीलाई मौका दिएको हो ।

सम्भावित प्लेईङ ११ :

आसिफ शेख, कुशल भुर्तेल, देव खनाल, रोहित पौडेल (उपकप्तान), दीपेन्द्रसिंह ऐरी, आरिफ शेख, विनोद भण्डारी (विकेटकिपर), सोमपाल कामी, करण केसी, सन्दीप लामिछाने (कप्तान) र किशोर महतो ।