default_image

1 year ago

October 29, 2022

फिलिप्सको शतक र बोल्टको घातक बलिङमा न्युजिल्यान्डको सानदार जित

एजेन्सी – ग्लेन फिलिप्सको शतक र ट्रेन्ट बोल्टको घातक बलिङमा न्युजिल्यान्डले आइसिसी टि२० विश्वकपमा श्रीलंकामाथि ६५ रनको सानदार जित हात पारेको छ । यो जितसँगै न्युजिल्यान्डले सेमिफाइनल सम्भावना बलियो बनाएको छ । जितको लागि १ सय ६८ रनको विजयी लक्ष्य पछ्याएको श्रीलंका १९.२ ओभरमा १ सय २ रनमा अल आउट भयो । श्रीलंकाका भानुका राजपक्षले […]

74 views

0 Bookmark

एजेन्सी – ग्लेन फिलिप्सको शतक र ट्रेन्ट बोल्टको घातक बलिङमा न्युजिल्यान्डले आइसिसी टि२० विश्वकपमा श्रीलंकामाथि ६५ रनको सानदार जित हात पारेको छ । यो जितसँगै न्युजिल्यान्डले सेमिफाइनल सम्भावना बलियो बनाएको छ ।

जितको लागि १ सय ६८ रनको विजयी लक्ष्य पछ्याएको श्रीलंका १९.२ ओभरमा १ सय २ रनमा अल आउट भयो । श्रीलंकाका भानुका राजपक्षले २२ बलमा ३ चौका र २ छक्कासहित ३४ रन बनाए । कप्तान दासुन शनकाले ३४ बलमा ४ चौका र १ छक्कासहित सर्वाधिक ३५ रन बनाए । अन्य ९ खेलाडीले दोहोरो अंकमा रन बनाउन सकेनन् ।

टिम साउथीले ओपनर पाथुम निसांकालाई पहिलो ओभरको पाँचौं बलमा शून्यमा एलबीडब्लू आउट गरे । दोस्रो ओभरको तेस्रो बलमा बोल्टले कुशल मेन्डिसलाई विकेटकिपर डेभन कन्वेबाट ४ रनमा क्याच गराए ।

अन्तिम बलमा धनन्जय डि सिल्भालाई शून्यमा बोल्ड गर्दै सुरुवाती दुई ओभरमै ५-३ को दयनीय अवस्थामा पुर्याए । बोल्टले चारिथ असलंकालाई ४ रनमा क्याच गराउँदै ८–४ को अवस्थामा पुर्याए । त्यसपछि चामिका करुणारत्ने ३, वानिन्दु हसरंगा ४ र महेश थिक्सना शून्यमा आउट भए ।

न्युजिल्यान्डका तीव्र गतिका बलर ट्रेन्ट बोल्टले ४ ओभरमा १३ रन खर्चेर ४ विकेट लिए । मिचेल सान्टनारले ४ ओभरमा २१ रन खर्चेर २ विकेट लिए । ईश सोधीले दुई, टिम साउथी र लोकी फर्गुसनले एक एक विकेट लिए ।

त्यसअघि सिड्नी क्रिकेट ग्राउन्डमा टस जितेर पहिला ब्याटिङ रोजेको न्युजिल्यान्डले निर्धारित २० ओभरमा ७ विकेट गुमाउँदै १ सय ६७ रन बनाएको थियो । न्युजिल्यान्डका ग्लेन फिलिप्सले ६४ बलमा १० चौका र ४ छक्कासहित सर्वाधिक १ सय ४ रनको सानदार शतकीय इनिङ खेले ।

उनले ६१ बलमा शतक पूरा गरे । स्पिनर महेश थिक्सनालाई १९ औं ओभरको पाँचौं बलमा डिप स्क्वायर लेगमा चौका हान्दै शतक पूरा गरेका थिए । उनको विश्वकपमा पहिलो र टि२० आई करिअरको दोस्रो शतक हो । कठिन समयबाट शतक हान्दै न्युजिल्यान्डलाई सुरक्षित योगफलमा पुर्याएका हुन् ।

त्यसअघि उनले दुई महत्वपूर्ण जीवनदान पाए । स्पिनर वानिन्दु हसरंगाको सातौं ओभरको पाँचौं बलमा पाथुम निसांकाले फिलिप्सको ब्यक्तिगत १२ रनमा सहज क्याच छोड्न पुगेका थिए । त्यस्तै चामिका करुणारत्नेको १४ औं ओभरको दोस्रो बलमा कप्तान दासुन शनकाले ४५ रनमा पुन क्याच छोड्न पुगे ।

न्युजिल्यान्डको सुरुवात खराब रह्यो । ओपनर फिन एलेन स्पिनर महेश थिक्सनाको पहिलो ओभरको चौथो बलमै एक रनमा बोल्ड हुन पुगे । तेस्रो ओभरको दोस्रो बलमा धनन्जय डि सिल्भाले डेभन कन्वेलाई एक रनमा बोल्ड गरे । तीव्र गतिका बलर कासुन रजिथाको बलमा कप्तान केन विलियम्सन ८ रनमा कुशल मेन्डिसबाट क्याच आउट भएपछि न्युजिल्यान्ड ४ ओभरमा १५–३ को कमजोर अवस्थामा पुगेको थियो ।

चौथो विकेटका लागि फिलिप्स र डर्याल मिचेलले ८४ रनको साझेदारी गरेका थिए । मिचेललाई हसरंगाले १५ औं ओभरको तेस्रो बलमा २२ रनमा बोल्ड आउट गरे । जेम्श निशम ५, मिचेल सान्टनार ११ र ईश सोधीले एक रन बनाए । श्रीलंकाको फिल्डिङ भने कमजोर रह्यो ।

श्रीलंकाका कासुन रजिथाले ४ ओभरमा २३ रन खर्चेर २ विकेट लिए । महेश थिक्सना, धनन्जय डि सिल्भा, वानिन्दु हसरंगा र लाहिरु कुमाराले एक एक विकेट लिए ।

न्युजिल्यान्डले पहिलो खेलमा अष्ट्रेलियालाई ८९ रनले हराउँदा अफगानिस्तानसँग अंक बाँडेको थियो । न्युजिल्यान्ड सुपर १२ को समूह ए मा ५ अंकका साथ शीर्ष स्थानमा छ । न्युजिल्यान्डले अव मंगलबार इंग्ल्यान्ड र शुक्रबार आयरल्यान्डसँग खेल्नेछ । न्युजिल्यान्ड दुबै खेलमा विजयी हुँदा समूह विजेता बन्दै सेमिफाइनलमा पुग्नेछ । एक खेलमा पराजित हुँदा नेटरनरेटमा निर्भर रहनेछ ।

यता श्रीलंकाले पहिलो खेलमा आयरल्यान्डलाई ९ विकेटले हराएको थियो । दोस्रो खेलमा अष्ट्रेलियासँग ७ विकेटले पराजित भएको थियो । श्रीलंकाको सेमिफाइनल सम्भावना अव झिनो अंक गणीतिय मात्रै छ । श्रीलंकाले अव मंगलबार अफगानिस्तान र शनिबार इंग्ल्यान्डसँग खेल्नेछ ।

अंक तालिका

सुपर १२ को समूह ए मा न्युजिल्यान्ड ३ खेलमा २ मा जितसहित ५ अंकका साथ शीर्ष स्थानमा छ । इंग्ल्यान्ड ३ खेलमा १ मा जित, १ मा हार र १ खेल रद्ध हुँदा ३ अंकका साथ दोस्रो स्थानमा छ । आयरल्यान्ड ३ खेलमा १ मा जित, १ मा हार र १ खेलमा अंक बाँड्दै तेस्रो स्थानमा छ ।

अष्ट्रेलिया ३ खेलमा १ मा जित, १ मा हार र १ खेलमा अंक बाँड्दै चौथो स्थानमा छ । अफगानिस्तान ३ खेलमा १ मा हार र दुई खेलमा अंक बाँड्दै पाँचौं स्थानमा छ । श्रीलंका ३ खेलमा १ मा जित र ३ मा हार सहित पुछारमा छ ।

सुपर १२ को समूह बी मा भारत २ खेलमा ४ अंकका साथ शीर्ष स्थानमा छ । दक्षिण अफ्रिका २ खेलमा १ मा जित र १ मा अंक बाड्दै ३ अंकका साथ दोस्रो स्थानमा छ ।

जिम्बावे २ खेलमा १ मा जित र १ मा अंक बाँड्दै ३ अंकका साथ तेस्रो स्थानमा छ । बंगलादेश २ खेलमा १ मा जित र १ मा हारसहित चौथो स्थानमा छ । पाकिस्तान र नेदरल्यान्ड्स अंक विहीन हुँदै पुछारमा छन् ।

April 15, 2024

मुम्बईमाथि चेन्नईको जित

एजेन्सी – चेन्नई सुपर किंग्सले इन्डियन प्रिमियर लिग (आइपिएल) मा आइतबार मुम्बई इन्डियन्समाथि सानदार जित निकालेको छ । चेन्नईले मुम्बईलाई २० रनले हराएको हो । २ सय ७ रनको लक्ष्यको पछ्याएको मुम्बईले नटआउट रोहित शर्माको शतकका बावजुद २० ओभरमा ६ विकेटको क्षतिमा १ सय ८६ रन मात्र बनाउन सक्यो । रोहित र इशान शर्माले पहिलो […]

April 14, 2024

हङकङ साउदी अरबविरुद्ध स्तब्ध

मस्कट (हाम्रो खेलकुद) – ओमानमा जारी एसिसि प्रिमियर कपमा हङकङ साउदी अरेबिया विरुद्ध स्तब्ध भएको छ । समूह ए अन्तर्गत अल अमेरातमा भएको खेलमा हंगकंगलाई साउदीले ५५ रनको हार चखाएको हो । साउदीले दिएको २ सय ३ रनको विशाल लक्ष्य पछ्याएको हङकङ १८.५ ओभरमा १ सय ४७ रनमा समेटियो । हङकङका लागि कप्तान निजाकत खानले […]

April 14, 2024

अकिबको ह्याट्रिकमा ओमानले कम्बोडियालाई हरायो

मस्कट (हाम्रो खेलकुद) – अलराउन्डर अकिब इल्यासले ह्याट्रिक लिएपछि एसीसी मेन्स प्रिमियर कप २०२४ अन्तर्गत समूह बी को खेलमा आयोजक ओमानले कम्बोडियालाई ६३ रनले पराजित गरेको छ । अल अमेरत मैदानमा आइतबार वर्षाले खेलको सुरुवात प्रभावित भएपछि ११ ओभरमा घटाइएको थियो । कम्बोडियाले टस जितेर ओमानलाई पहिलो ब्याटिङको निम्तो दिने निर्णय सफल भने भएन । […]

Success

Thank you for your time.