काठमाडौं (हाम्रो खेलकुद) ( बायाँ हाते अलराउन्डर तथा कप्तान दीपेश कंडेलको अलराउन्ड प्रदर्शनमा प्रदेश एकलले वाई वाई यू१९ राष्ट्रिय क्रिकेट प्रतियोगितामा गण्डकी प्रदेशलाई २१ रनले हराउँदै विजयी सुरुवात गरेको छ । गण्डकीको लगातार दोस्रो हार हो ।

मुलपानी क्रिकेट मैदानमा टस जितेर पहिला ब्याटिङ थालेको प्रदेश एक ४९.४ ओभरमा १ सय ८३ रनमा अल आउट भयो । ओपनर सोनु अन्सारीले ९४ बलमा ६ चौका र १ छक्कासहित सर्वाधिक ६४ रन बनाए । कप्तान दीपेश कंडेलले ७५ बलमा २ छक्कासहित ३६ र फिजाल रहमानले ४१ बलमा ३ चौकासहित २६ रन बनाए । अन्य कुनैपनि ब्याटरले राम्रो प्रदर्शन गर्न सकेनन् ।
गण्डकीका शिषिर भुषालले ७.४ ओभरमा २८ रन खर्चेर ४ विकेट लिए । निर्तेश गिरीले १० ओभरमा २ मेडनसहित २४ रन खर्चेर ३ विकेट लिए । सुवास भण्डारीले १० ओभरमा ३१ रन खर्चेर २ विकेट लिए । सुदीप अर्यालको नाममा एक विकेट रह्यो ।

जितको लागि १ सय ८४ रनको विजयी लक्ष्य पछ्याएको गण्डकी ४८.३ ओभरमा १ सय ६२ रनमा अल आउट भयो । गण्डकीका करण पंगेनीले ८६ बलमा ४ चौकासहित सर्वाधिक ४८ रनमा कट एण्ड बोल्ड आउट भए । ओपनर अर्जुन कुमाल ६० बलमा २ चौकासहित २२, सोहेल कुँवर ९, चिब्रिन श्रेष्ठ ५, दीपक ड्रुमे २५, सचिनराज अधिकारी २, सुवास भण्डारीले १८ र शिषिर भुषालले १० रन बनाए ।

प्रदेश एकका दीपेश कंडेलले १० ओभरमा ३ मेडनसहित २१ रन खर्चेर ३ विकेट लिए । अश्विन महतोले १० ओभरमा ३२ रन खर्चेर ३ विकेट लिए । विपिन महतो र सोनु अन्सारीले दुई दुई विकेट लिए ।