काठमाडौं (हाम्रो खेलकुद) – नेपाल क्रिकेट संघ (क्यान) ले बलात्कार आरोप लागेका सन्दीप लामिछाने राष्ट्रिय टोलीमा फर्किने बारे जवाफ दिएको छ । क्यानले नेपाल टि २० लिग विवाद बारे बिहीबार आयोजना गरेको पत्रकार सम्मेलनमा अध्यक्ष चतुरबहादुर चन्दले सन्दीप बारे बोलेका छन् ।

‘सन्दीप नेपालका लागि चाहिँने खेलाडी हुन् भन्नेमा कुनै लुकाउने पर्ने कुरा छैन । तर नेपालको कानुनले कुन किसिमको स्वीकृति दिन्छ त्यसको लागि सम्बन्धित निकायमा हामीले पहल गरेका छौं । त्यो अनुसार हामी अगाडि बढ्छौं’, चन्दले भने ।

चन्दले अगाडि भने, क्यान त्यसैपनि विभिन्न कारणले घेराबन्दीमा परेको हुँदा हामी धेरै बोल्न सक्दैनौं । आइसिसीले हामीलाई के भनेको छ भने नेपालको कानुनले अनुमति दिन्छ भने तिमीहरु अघि बढ । नेपालको कानुनमा हामी छलफल गरि राखेका छौं । सम्बन्धित निकायसँग सुझाव मागेका छौं । त्यसपछि मात्रै हामी निर्णय लिन्छौं ।’

नेपालले आगामी महिना घरेलु मैदान टियुमा आइसिसी विश्वकप लिग–२ त्रिकोणात्मक ओडिआई सिरिजमा स्कटल्यान्ड र नामिबियासँग खेल्दैछ । क्यानले एक दुई दिनमै राष्ट्रिय टोलीको बन्द प्रशिक्षण बोलाउने तयारी गरिरहेको बताइएको छ । त्यसैले सन्दीप खेल्छन् वा खेल्दैनन् भन्ने धेरैको चासो छ ।

सन्दीपलाई पुष २९ मा उच्च अदालत पाटनले काठमाडौं जिल्ला अदालतको आदेश बदर गर्दै २० लाख धरौटीमा रिहा गर्न दिएको थियो । तर सन्दीप दोषी हुन् वा होइनन् भन्ने निर्णय भने काठमाडौं जिल्ला अदालतले फैसला गर्नेछ ।

उच्च अदालतले सन्दीपलाई विदेश जान रोक लगाएको छ । अदालतले यथाशिघ्र सन्दीपको राहादानी रोक्का गर्न गृह मन्त्रालय र पराराष्ट्र मन्त्रालयलाई समेत जानकारी दिएको छ । यदि सन्दीप काठमाडौं उपत्यका छाड्दा जिल्ला प्रहरी परिसर काठमाडौंलाई लिखित जवाफ दिनु पर्ने समेत जनाएको छ । काठमाडौं छाड्ने र फर्किने मितिसँगै त्यो स्थानमा रहने नाम समेत जनाउनु पर्ने हुन्छ ।

सन्दीपले क्रिकेट खेल्न पाउने वा नपाउने भन्ने अदालतको आदेशमा उल्लेख छैन ।केहि कानुन व्यवसायी भने सन्दीपले तत्काल खेल्न नपाउने बताउँदै आएका छन् । भदौ ५ गते काठमाडौंको एक होटलमा लगेर नाबालिगलाई बलात्कार गरेको आरोप सन्दीपमाथि लागेको थियो ।