काठमाडौं (हाम्रो खेलकुद) – नेपाली क्रिकेट टोलीका कप्तान रोहित पौडेलले आइसिसी विश्वकप लिग-२ त्रिकोणात्मक ओडिआई सिरिजमा पपुवा न्युगिनीविरुद्ध उक्त समयमा आफ्नो सट आवश्यक नरहेको बताएका छन् । नेपाललाई लगातार पाँच ओडिआई खेल जिताएपछि कप्तान रोहित पौडेलले आफ्नो सट त्यो समयमा गलत रहेको प्रतिक्रिया दिएका छन् ।

‘त्यो अवस्थामा त्यो सट खेल्न हुँदैन थियो । त्यो समय आवश्यक नहुँदा त्यसैले म चिन्तित थिएँ’, रोहितले आफ्नो आउट बारे भने । रोहित कप्तान असाद भालाको बलमा नर्मन भानुवाबाट २१ बलमा २ चौकासहित २० रनमा क्याच आउट भएका थिए । ठूलो सटको धुनमा रोहित क्यान आउट हुन पुगेका थिए ।

‘हामीले लक्ष्य पछ्याउँदा आसिफ र कुशल दाइले राम्रो सुरुवात दिनु भएको थियो । तर त्यसपछि भने साझेदारी भएन । एक दुई विकेट गयो । पछि आरिफ र दिपेन्द्र दाइले राम्रो साझेदारी गर्नुभयो । साझेदारी कमी हुँदा अन्तिममा केहि गाह्रो भयो’, रोहितले भने ।

पछिल्लो समय सोमपाल कामीले ब्याटिङमा नेपालको फिनिसिङ गर्दै आएका छन् । सोमपालको भूमिका खेल फिनिस गर्ने रहेको रोहित बताउँछन् । ‘सोमपाल दाइको भूमिका खेल फिनिस गर्ने हो । अवसर पाउँदा फिनिस गर्ने भूमिका हो । सोमपालले सहज पूरा गर्दै आफूलाई यो भूमिका नदेउ पनि भन्नु हुन्छ’, उनले भने।

आरिफ शेख टोलीमा फर्किएका छन् । आरिफले घरेलु मैदानमा स्कटल्यान्ड र नामिबियासँगको सिरिजमा विरामी हुँदा गुमाएका थिए । आसिफ टोलीमा हुँदा ब्याटिङ भरपदोसँगै तीव्र गतिको बलिङको विकल्प समेत हुनेछ।

‘दाइ(आरिफ) निर्भर खेलाडी छन् । समग्रमा ब्याटिङ, बलिङ, फिल्डिङ सबैमा राम्रो अलराउन्डर हुनुन्छ । दाइले आज बलिङ र ब्याटिङ दुबैमा आफ्नो क्षमता पनि देखाउनु भयो’, रोहितले भने ।

नेपालले आज सोमपाल कामी, करण केसी, प्रतिश जि.सी र गुलशन झालाई तीव्र गतिको बलरको रुपमा मैदान उतारेको थियो । नेपालले पहिलो पटक चार तीव्र गतिका बलर मैदान उतारेको थियो । पहिलो पटक टोलीमा स्पिनर थिएनन् । रोहित पिच हेरेर निर्णय लिएको बताउँछन् ।

‘विकेटहेरेपछि हामीलाई अनुभव भयो की मिडिया पेसरमा अलि कट हुनसक्छ । त्यसैले उक्त निर्णय लिएका हौं’, रोहितले भने । बायाँ हाते तीव्र गतिका बलर प्रतिश डेब्यूले आजको खेलमा डेब्यू गरेका थिए । २०१८ पछि नेपालले बायाँ हाते बलरलाई टोलीमा डेब्यू दिएको थियो । रोहित प्रतिशको डेब्यू एकदमै राम्रो भएको बताउँछन् ।

‘प्रतिशको डेब्यू एकदमै राम्रो रह्यो । हामीले जुन अपेक्षा गरेका थियौं त्यसै अनुसार बलिङ गरेको थियो । अझ राम्रो हुन सक्थ्यो । तर डेब्यूमा राम्रो गर्यो’, रोहितले भने ।

रोहितको कप्तानीमा नेपालले पहिलो पटक ओडिआईमा लगातार पाँच ओडिआई खेल जितेको छ । यसअघि टियु मैदानको प्रभाव भनिएको थियो । पाँचै खेल नेपालले लक्ष्य पछ्याउँदै जितेको थियो । ‘लक्ष्य पछ्याउँदा हामीले सहज महसुस गरेका छौं । विकेटपनि दोस्रो इनिङमा ब्याटिङ गर्न सहज छ । हाम्रो भूमिका के हो र खेल कति महत्वपूर्ण छ हामीलाई थाहा छ । हरेक खेललाई फाइनको रुपमा हेरेका छौं’, रोहितले भने ।

लिग-२ मा नेपाल र युएईबीच शीर्ष चीन र पाँचमा पर्न कडा प्रतिस्पर्धा छ । नेपालले बिहीबार घरेलु टोली युएईसँग खेल्नेछ । दुवै टोलीको लागि यो खेल निकै महत्वपूर्ण हुनेछ । कप्तान रोहित दबाबमा राम्रो गर्ने टोलीले जित्ने बताउँछन् । ‘युएईसँगको खेल निकै महत्वपूर्ण छ । मलाई के अनुभव हुन्छ भने त्यति बेला जसले दबाब सम्हाल्न सक्छ त्यहिँ टिमले नै जित्छ’, रोहितले भने ।