दुबई (हाम्रो खेलकुद) – नेपाली क्रिकेट टोलीका स्पिनर सन्दीप लामिछानेले आइसिसी विश्वकप लिग २ त्रिकोणात्मक ओडिआई सिरिजमा घाइते स्पिनर मौसम ढकालको स्थान लिने भएका छन् ।

नेपाल क्रिकेट संघ (क्यान) ले सन्दीपले मौसमको स्थान जनाएको छ । सन्दीप आजनै नेपालबाट दुबई आउँदैछन् । मौसम मंगलबार अभ्यासको क्रममा नेटमा ब्याटिङ गर्दा घाइते भएका थिए ।

मुख्य प्रशिक्षक मोन्टी देशाईले गरेको थ्रो-डाउनले मौसमको दायाँ हातको काँधका चोट लाग्न पुगेको थियो । बाउन्सर बलले उनको काँधमा लाग्न पुगेको थियो । बुधबार नेपाली क्रिकेट टोलीले आइसिसी एकेडेमीमा अभ्यास गरिरहँदा मौसम भने आइसिङ गरेर बसेका छन् ।

सर्वोच्च अदालतले सन्दीपलाई विदेश जान अनुमति दिएपछि युएई आउन लागेका हुन् । अघिल्लो साता आइसिसी विश्वकप लिग २ मा सन्दीपले स्कटल्यान्ड र नामिबियाविरुद्ध ४ खेलमा १३ विकेट लिएका थिए । तर उच्च अदालत पाटनले उनलाई विदेश जान रोक लगाएको हुँदा नेपाली टोलीसँग आएका थिएनन् ।

नेपालले पहिलो खेलमा सोमबार पपुवा न्युगिनीलाई चार विकेटले हराएको थियो । नेपालले बिहीबार युएईसँग खेल्दैछ । शुक्रबार पपुवा न्युगिनी र ६ मार्चमा युएईसँग खेल्नेछ ।

लिग २ मा यो नेपालको अन्तिम विदेश भ्रमण समेत हो । त्यसपछि नेपालले घरेलु मैदानमा पपुवा न्युगिनी र युएईसँग खेल्नेछ । नेपाल शीर्ष तीनमा रहँदै सोझै ओडिआई मान्यता पाउन अव ७ मध्य ६ खेल जित्नुपर्ने हुन्छ । शीर्ष पाँचमा रहँदै सोझै ओडिआई मान्यता पाउन नेपालले चार खेल जित्नुपर्ने हुन्छ । नेपाल २९ खेलमा २८ अंकका साथ छैटौं स्थानमा छ ।