एजेन्सी – युएईका पूर्व कप्तान अहमेद राजाले अन्तर्राष्ट्रिय क्रिकेटबाट सन्न्यासको घोषणा गरेका छन् । १७ वर्षको करिअरबाट बिदा लिएको राजाले सामाजिक सञ्जालबाट जानकारी दिएका छन् ।

३४ वर्षीय बायाँ हाते स्पिनर राजाले २००६ देखि युएईबाट खेल्न सुरु गरेका थिए । उनले २०१४ देखि २०२२ सम्म ५६ अन्तर्राष्ट्रिय खेलमा कप्तानी गर्दा ३२ खेल जिताएका थिए । गतवर्ष टि२० विश्वकप छनोट ए मा नेपाललाई सेमिफाइनलमा हराउँदै युएईलाई विश्वकपमा पुर्याउन राजाले पाँच विकेट लिँदै प्लेयर अफ द म्याच चुनिएका थिए ।

युएईले उक्त विश्वकप छनोटमा आयरल्यान्डलाई हराउँदै उपाधि जितेको थियो । तर त्यसपछि भने युएईले उनलाई कप्तानबाट हटाएको थियो । अष्ट्रेलियामा सम्पन्न टि२० विश्वकप अघि उनलाई युएईले कप्तानबाट हटाउँदै सिपी रिजवानलाई नियुक्त गरेको थियो । राजाले ५३ ओडिआई खेलमा ६४ विकेट लिनुको साथै ४ सय ९ रन बनाएका छन् । ५५ टि२० आई खेलमा ३७ विकेट लिएका थिए ।

उनले युएईको लागि २००६ मा भारत ए विरुद्ध लिष्ट ए खेलमा डेब्यू गरेका थिए । राजाले अन्तिम खेल नेपालविरुद्ध २०२२ को नोभेम्बरमा टियु मैदानमा खेलेका थिए । उनी युएईबाट सर्वाधिक ओडिआई र टि२० आई खेलमा कप्तानी गर्ने खेलाडी हुन् ।

राजाले २९ ओडिआई खेलमा १४ मा जित र १४ मा हार व्येहोरेका थिए । उनले टि२० आई खेलमा २७ खेलमा कप्तानी गर्दा १८ मा जित र ९ मा हार व्येहोरेको थियो ।

*यसअघि २९ हुनुपर्नेमा अन्यथा भएकोले सच्चाइएको छ ।