एजेन्सी – एसिसी प्रिमियर कप एकदिवसीय प्रतियोगिता खेल्न नेपाल आउन लागेको बहराइन २६ रनमा अल आउट भएको छ । एसिसी च्यालेन्जर कपको फाइनलमा खेलमा बहराइन साउदी अरेवियासँग २१.१ ओभरमा २६ रनमा अल आउट भयो ।

बहराइनका कुनैपनि खेलाडीले दोहोरो अंकमा रन बनाउन सकेनन् । बहराइनका अब्दुल मजिदले ४२ बलमा १ चौकासहित सर्वाधिक ७ रन बनाए । साउदीका अतिफ उर रहमानले ८ ओभरमा ३ मेडनसहित १० रन खर्चेर ४ विकेट लिए । इस्तियाक अहमदले ८ ओभरमा ३ मेडनसहित ६ रन खर्चेर ३ विकेट लिए ।

जितको लागि २७ रनको विजयी लक्ष्य पछ्याएको ४.१ ओभरमा कुनै विकेट नगुमाइ पूरा गर्दै च्याम्पियन बनेको छ । साउदीका अकार उल हसनले १६ र अब्दुल अहेदले ६ रन बनाए ।

साउदी र बहराइन एसिसी च्यालेन्जर कप २०२३ बाट नेपालमा हुने एसिसी प्रिमियर कपमा छनोट भएका छन् । एसिसी प्रिमियर कप आगमी अप्रिल २५ देखि मे ८ सम्म टियु र मुलपानी क्रिकेट मैदानमा हुँदैछ ।

प्रतियोगिता समूह ए मा नेपाल, कुवेत, युएई, साउदी र कतार छन् । समूह बी मा ओमान, हङकङ, सिंगापुर, मलेसिया र बहराइन छन् । प्रतियोगिता शीर्ष दुई दुई टोलीले सेमिफाइनल खेल्नेछन् । उपाधि विजेता टोलीले सेप्टेम्बरमा पाकिस्तानमा हुने एसिया कप खेल्न पाउनेछ ।

तर भारतले पाकिस्तानमा खेल्न नजाने भएपछि एसिया कप त्यहाँबाट युएई सर्ने सम्भावना छ । प्रिमियर कपको विजेताले समूह ए मा हुने भारत र पाकिस्तानसँग प्रतिस्पर्धा गर्नेछ । एसिया कपको समूह बी मा अफगानिस्तान, बंगलादेश र श्रीलंका छन् ।