दुबई (हाम्रो खेलकुद) – घरेलु टोली युएई आइसिसी विश्वकप लिग २ त्रिकोणात्मक ओडिआई सिरिजमा पपुवा न्युगिनीविरुद्ध संकटमा पुगेको छ । दुबई इन्टरनेशल क्रिकेट स्टेडियममा टस हारेर पहिला ब्याटिङ थालेको युएईले २२.१ ओभरमा ७ विकेट गुमाउँदै ८२ रन बनाएको छ ।

युएईले ओपनर आसिफ खानलाई ११ रनमा आठौं ओभरको तेस्रो बलमा गुमाएको थियो । आसिफ आउट हुँदा युएई २७-१ को अवस्थामा थियो । दोस्रो विकेटका लागि मोहम्मद वासिम र वृत्य अरविन्दले २९ रनको साझेदारी गरेका थिए ।

आसिम ३६ बलमा २ चौकासहित १९ रनमा आउट भए । दुवै ओपनर तीव्र गतिका बलर चाद सोपरको बलमा एलबी डब्लू आउट भएका थिए ।

राइली हेकुरेको बलमा वृत्य अरविन्द ठूलो सट खेल्ने धुनमा टप एज लागेर मिडअनमा असाद भालाबाट २६ रनमा क्याच आउट भए । वृत्यले ३२ बलमा ४ चौका प्रहार गरे । त्यसअघिको बलमा वृत्यले डिपमिडविकेटमा उत्कृष्ट चौका प्रहार गरेका थिए । गलत सट खेल्दै वृत्य पेभलिएन फर्के । त्यसपछि युएईले लगातार विकेट गुमायो ।

स्पिनर चाल्र्स अमिनीको बलमा रोहन मुस्तफा फस्ट स्लिपमा शून्यमा क्याच आउट भए । हेकुरेले अर्यान लर्कालाई शून्यमै बोल्ड आउट गरे ।

आयन खान अफ्जलसँग तालमेल नमिल्दा कप्तान रिपी रिजवान १० रनमा रन आउट भएपछि युएई संकटमा पुगेको हो । आयन खान शून्यमा बोल्ड भएपछि युएई ८२-७ को दयनीय अवस्थामा पुगेको हो ।

अरविन्द आउट हुनुअघि युएई १८.३ ओभरमा ७६-२ को अवस्थामा थियो । तर बाँकी पाँच विकेट युएईले ६ रनमा गुमाएपछि संकटमा पुगेको हो ।