एजेन्सी – पहिलो संस्करणको वुमन्स प्रिमियर लिग (डब्लूपिएल) टि२० प्रतियोगितामा दिल्ली क्यापिटल्सले रोयल च्यालेन्जर्स बेंगलोरलाई ६० रनले पराजित गर्दै सानदार सुरुवात गरेको छ।

जितको लागि २ सय २४ रनको विशाल विजयी लक्ष्य पछ्याएको बेंगलोरले निर्धारित २० ओभरमा ८ विकेट गुमाउँदै १ सय ६३ रन बनायो । बेंगलोरकी हेथर नाइटले २१ बलमा २ चौका र २ छक्कासहित सर्वाधिक ३३ रन बनाइन् ।

कप्तान स्मृति मन्धना २३ बलमा ५ चौका र १ छक्कासहित ३५ र ऐलिसा पेरी १९ बलमा ५ चौकासहित ३१ रनमा आउट भइन् । मेगन स्कट १९ बलमा ५ चौकासहित ३० रनमा अविजित रहिन् । अन्य कुनैपनि ब्याटरले राम्रो प्रदर्शन गर्न सकेनन् । दिल्लीकी तारा नोरिसले ४ ओभरमा २९ रन खर्चेर पाँच विकेट लिइन् ।

त्यसअघि मुम्बईमा टस हारेर पहिला ब्याटिङ थालेको दिल्लीले निर्धारित २० ओभरमा २ विकेट गुमाउँदै २ सय २३ रन बनाएको थियो । दिल्लीको जितमा ओपनर शफाली बर्माले ४५ बलमा १० चौका र ४ छक्कासहित ८४ रनको विष्फोटक इनिङ खेलिन् । मेग ल्यानिङले ४३ बलमा १० चौकासहित ७२ रनको इनिङ खेलिन् ।

दिल्लीलाई विशाल योगफलमा पुर्याउन ओपनर शफाली बर्मा र मेग ल्यानिङले पहिलो विकेटका लागि १४.३ ओभरमा १ सय ६२ रनको विष्फोटक शतकीय साझेदारी गरेका थिए ।

मरिजान कैप्प १७ बलमा ३ चौका र ३ छक्कासहित ३९ र जेमिमाह रोड्रिग्स २२ रनमा अविजित रहिन् । बेंगलोरको दुवै विकेट हेथर नाइटले लिएकी थिइन् । पहिलो खेलमा मुम्बई इन्डियन्सले गुजरात जायन्ट्सलाई हराएको थियो ।