एजेन्सी – अलरान्डर सकिब अल हसनको सानदार अलराउन्ड प्रदर्शनमा बंगलादेशले तेस्रो ओडिआई खेलमा इंग्ल्यान्डलाई ५० रनले पराजित गरेको छ । बंगलादेशले सुरुवाती दुई खेल गुमाएपनि अन्तिम खेलमा जितका साथ सिरिजमा क्लिनस्विप हुनबाट बचेको हो ।

जितको लागि २ सय ४७ रनको विजयी लक्ष्य पछ्याएको इंग्ल्यान्ड ४३.१ ओभरमा १ सय ९६ रनमा अल आउट भयो । इंग्ल्यान्डका जेम्श भिन्सले ४४ बलमा ३ चौका र १ छक्कासहित सर्वाधिक ३८ रन बनाए । ओपनर जेसन रोय १९, फिलिप साल्ट ३५, डेविड मलान डक, साम करन २३ र जस बटलर २६ रनमा आउट भए । क्रिस वोक्सले ३४ रन बनाए ।

बंगलादेशका सकिब अल हसनले १० ओभरमा ३५ रन खर्चेर सर्वाधिक चार विकेट लिए । इबादोत हुसेन र ताइजुल इस्लामले दुई दुई विकेट लिए ।

त्यसअघि जहुर अहमेद चौधरी स्टेडियममा टस जितेर पहिला ब्याटिङ रोजेको बंगलादेश ४८.५ ओभरमा २ सय ४६ रनमा अल आउट भएको थियो । बंगलादेशका सबिक अल हसनले ७१ बलमा ७ चौकासहित सर्वाधिक ७५ रन बनाए । मुश्फिकुर रहिम ९३ बलमा ६ चौकासहित ७० रनमा आउट भए ।

सकिब र मुश्फिकुरले तेस्रो विकेटका लागि ९८ रनको साझेदारी गरेका थिए । नाज्मुल हसन सान्टो ७१ बलमा ५ चौकासहित ५३ रनमा आउट भए । अन्य ब्याटरले भने राम्रो प्रदर्शन गर्न सकेनन् ।

इंग्ल्यान्डका जोफ्रा आर्चरले सर्वाधिक तीन विकेट लिए । साम करन र आदिल राशिदले दुई दुई विकेट लिए । पहिलो र दोस्रो खेलमा इंग्ल्यान्ड तीन विकेट र १ सय ३२ रनले विजयी हुँदै सिरिज जितेको थियो ।