एजेन्सी – वुमन्स प्रिमियर लिग (डब्लूपिएल) मा रोयल च्यालेन्जर्स बेंगलोर वुमन्स टोलीले लगातार तेस्रो खेलमा पराजित भएको छ । बेंगलोर बुधबार राती गुजरात जोयन्ट्ससँग ११ रनले पराजित हुन पुग्यो।

जितको लागि २ सय २ रनको विजयी लक्ष्य पछ्याएको बेंगलोरले निर्धारित २० ओभरमा ६ विकेट गुमाउँदै १ सय ९० रन बनायो । बेंगलोरकी सोफी डेभिनले ४५ बलमा ८ चौका र २ छक्कासहित सर्वाधिक ६५ रनको योगदान दिएपनि टोलीको हार टार्न सकिनन् । कप्तान स्मृति मन्धना १८, एलिसा पेरी ३२ र हेथर नाइटले ३० रनको योगदान दिइन् ।

गुजरातकी एलिसा गार्डनरले ४ ओभरमा ३१ रन खर्चेर ३ विकेट लिइन् । त्यसअघि मुम्बईमा टस जितेर पहिला ब्याटिङ रोजेको गुजरातले निर्धारित २० ओभरमा ७ विकेट गुमाउँदै २ सय १ रन बनायो । गुजरातकी हर्लिन डेओलले ४५ बलमा ९ चौका र १ छक्कासहित ६७ रनको योगदान दिइन् ।

सोफिया डंकले २८ बलमा ११ चौका र ३ छक्कासहित ६५ रनको आक्रामक इनिङ खेल्दै प्लेयर अफ द म्याच चुनिन् । बेंगलोरका श्रीयांका पाटिल र हेथर नाइटले दुई दुई विकेट लिइन् । बेंगलोर तीनै खेलमा पराजित हुँदै पुछारमा छ । डब्लूपिएलमा जित विहीन बेंगलोर एकमात्रै टोली हो ।

मुम्बई २ खेलमा ४ मा अंकका साथ शीर्ष स्थानमा छ । दिल्ली पनि २ खेलमा ४ अंकका साथ नेटरनरेटको कारण दोस्रो स्थानमा छ । प्रतियोगितामा पाँच टोलीको सहभागीता छ ।