काठमाडौं (हाम्रो खेलकुद) – नेपालका ओपनर आसिफ शेखले आइसिसी विश्वकप लिग–२ त्रिकोणात्मक ओडिआई सिरिज अन्तर्गत पपुवा न्युगिनीविरुद्ध उत्कृष्ट अर्धशतक प्रहार गरेका छन् । टियु क्रिकेट मैदानमा टस हारेर पहिला ब्याटिङको निम्तो पाएको नेपालले १७ ओभरमा कुनै विकेट नगुमाई १ सय २ रन बनाएको छ ।

नेपालका आसिफ शेखले ४७ औं बलमा करिअरको आठौं अर्धशतक पूरा गरेका थिए । आसिफ ५५ बलमा २ चौका र २ छक्कासहित ५५ रनमा क्रिजमा छन् । अर्का ओपनर कुशल भुर्तेल ५२ बलमा ६ चौकासहित ४५ रनमा क्रिजमा छन् ।

ओपनर आसिफ शेखले भने सुरुवातमै दुई ठूला जीवनदान पाएका थिए । तेस्रो ओभरको चौथो बलमै आसिफले ब्यक्तिगत पाँच रनमा जीवनदान पाए । चोभार एण्डबाट आएका तीव्र गतिका बलर सेमो कमियाको बलमा एज लागेपनि फस्ट स्लिपमा सेसे बाउले क्याच ड्रप गर्न पुगेपछि आसिफले सुरुवातमै जीवनदान पाएका थिए ।

आसिफले नवौं ओभरको पाँचौं बलमा पुन ब्यक्तिगत २२ रनमा जीवनदान पाए । पपुवा न्युगिनीका फिल्डरले पुन क्याच छाड्न पुगेका थिए ।

नेपालले आजको खेलमा टोलीमा एक परिवर्तन गरेको छ । नेपालले आजको खेलमा कुशल भुर्तेललाई प्लेइङ ११ मा खेलाएको छ । कुशललाई खेलाउँदा नेपालले प्रतिश जि.सीलाई बेन्चमा राखेको छ । नेपालले अन्य परिवर्तन भने गरेको छैन ।