काठमाडौं (हाम्रो खेलकुद) – पपुवा न्युगिनीले आइसिसी विश्वकप लिग–२ त्रिकोणात्मक ओडिआई सिरिज अन्तर्गत युएईविरुद्ध राम्रो ब्याटिङ सुरुवात गरेको छ । टियु क्रिकेट मैदानमा टस हारेर पहिला ब्याटिङको निम्तो पाएको पिएनजीले १९ ओभरमा १ विकेट गुमाउँदै १ सय ७ रन बनाएको छ ।

पिएनजीका हिरि हिरि ४७ बलमा ४ चौका र २ छक्कासहित ४४ रनमा क्रिजमा छन् । उनलाई सेसे बाउले ७ रनमा साथ दिएका छन् । पिएनजीलाई ओपनर किप्लिङ डोरिगा र हिरिले १०.१ ओभरमा ७२ रनको साझेदारी गर्दै राम्रो सुरुवात दिलाए ।

डोरिगा आयन खानको बलमा ५५ रनमा एलबीडब्लू आउट भए । डोरिगाले ४४ बलमा ८ चौका र २ छक्का प्रहार गरे ।

पिएनजीले नियमित ओपनर टोनी उराको स्थानमा हिरिलाई मैदान उतारेको थियो । त्यो अवसरलाई हिरिले राम्रो साथ दिएका छन् । यसअघि तल्लोक्रममा खेल्ने हिरिले राम्रो प्रदर्शन गरेका छन् । उराले मध्यक्रममा खेल्नेछन् ।

युएईको ३२ खेलमा ३१ अंक छ । शीर्ष पाँचमा रहँदै सोझै ओडिआई मान्यता जोगाउन बाँकी तीन खेल जित्नुपर्ने हुन्छ । शीर्ष तीनमा रहँदै सोझै विश्वकप छनोट खेल्न बाँकी चारै खेलमा विशाल जित हात पार्नुपर्ने हुन्छ । साथै नेटरनरेटमा निर्भर रहनेछ ।

पिएनजी भने शीर्ष पाँच दौडबाट बाहिरि सकेको छ । पहिलो खेलमा पिएनजी नेपालसँग ५२ रनले पराजित भएको थियो । यसै साता युएईलाई भने पपुवा न्युगिनीले दुवै खेलमा हराएको थियो ।