काठमाडौं (हाम्रो खेलकुद) – नेपालले दास्रो महिला टि२० आई खेलमा आज घरेलु टोली मलेसियासँग खेल्दैछ । खेल नेपाली समय अनुसार बिहान ८: ४५ मा बांगीमा सुरु हुनेछ । पाँच खेलको महिला टि२० आई सिरिजमा मलेसिया १-० ले अघि छ ।

नेपाल पहिलो खेलमा ५० रनमै अल आउट हुँदै मलेसियासँग ५ विकेटले पराजित भएको थियो । महिला टि२० आईमा नेपालको मलेसियासँग पहिलो हार थियो । नेपाल पहिलो खेलको गल्ती सुधार गर्दै दोस्रो खेलमा जितका साथ सिरिज बराबर गर्न चाहन्छ ।

पहिलो खेलमा नेपालकी सम्झना खड्काले सर्वाधिक १३ रन बनाएकी थिइन् । अन्य कुनैपनि ब्याटरले राम्रो गर्न सकेनन् । कप्तान रुविना क्षेत्री बेलबासे २ र सीता रानामगर शून्यमा आउट भएका थिए । यी दुई खेलाडीबाट नेपाल उत्कृष्ट प्रदर्शन चाहन्छ । सर्वाधिक अनुभवी खेलाडी हुँदा जिम्मेवारी प्रदर्शन गर्नुपर्ने हुन्छ।

नेपालले आज काजोल श्रेष्ठको स्थानमा ओपनरमा विन्दु रावललाई मौका दिनसक्छ । अप्सरी बेगमको स्थानमा सरस्वती चौधरीलाई मौका दिनसक्ने समभावना छ । इन्दु बर्मा र सम्झनाले राम्रो प्रदर्शन गर्नुपर्ने हुन्छ । झन्डै एकवर्ष पछि पहिलो अन्तर्राष्ट्रिय खेल खेलेको हुँदा नेपाललाई टिम सन्तुलन बनाउन नै कठिन परेको थियो ।

नेपालको तीव्र गतिको बलरमा अश्मिना कर्माचार्य र कविता कुँवर हुनेछन् । यी दुई जोडीबाट उत्कृष्ट सुरुवात चाहन्छ । कविता जोशी नेपालको हिटर हुन् । मलेसिया ऐश्या एलिसा र इजाती इस्मालीको जोडी पुन घातक बन्नसक्छ । नेपाल र मलेसियाबीच चार महिला टि२० आई खेल भएकोछ । जसमा नेपाल तीन र मलेसिया एक खेलमा विजयी भएका छन् ।

जेठ १८ मा (जुन १) मा नेपालले तेस्रो खेल खेल्नेछ । जेठ २० र २१ (जुन ३ र ४) मा नेपालले चौथो र पाँचौं खेल खेल्नेछ।

नेपालको टोली :

रुविना क्षेत्री बेलबासे (कप्तान), सीता रानामगर, इन्दु बर्मा, कविता कुवँर, कविता जोशी, अश्मिना कर्माचार्य, कृतिका मरासिनी, विन्दु रावल, अप्सरी बेगम, काजोल श्रेष्ठ, सम्झना खड्का, ईश्वरी विष्ट, ज्याति पाण्डे र सरस्वती चौधरी ।