एजेन्सी – कुशल मेन्डिस र दिमुथ करुणारत्नेको अर्धशतकमा श्रीलंकाले दोस्रो ओडिआई खेलमा अफगानिस्तानलाई ३ सय २४ रनको विशाल लक्ष्य दिएको छ । टस जितेर पहिला ब्याटिङ रोजेको श्रीलंकाले निर्धारित ५० ओभरमा ६ विकेट गुमाउँदै ३ सय २३ रन बनायो ।

श्रीलंकाका कुशल मेन्डिसले ७५ बलमा ७ चौका र १ छक्कासहित सर्वाधिक ७८ रनको योगदान दिए । उनी तीव्र गतिका बलर फरिद अहमदको बलमा विकेटकिपर रहमानउल्लाह गुरबाजबाट क्याच आउट हुँदै पेभेलिएन फर्केका थिए । त्यस्तै दिमुथ करुणारत्ने ६२ बलमा ७ चौकासहित ५२ रनमा आउट भए ।

श्रीलंकालाई ओपनर पाथुम निसंका र करुणारत्नेले १५.५ ओभरमा ८२ रन जोड्दै राम्रो सुरुवात दिलाएका थिए । निसांका ५६ बलमा ६ चौकासहित ४३ रनमा मोहम्मद नाबीको बलमा एलबीडब्लू आउट भए ।

सदिरा समाराविक्रमा ४६ बलमा ५ चौकासहित ४४, चरिथ असलंका ६ र दासुन शानका २३ रनमा आउट भए । वानिन्दु हसरंगा १२ बलमा ४ चौका र १ छक्कासहित २९ रनमा नटआउट रहे । धनन्जय डि सिल्भा २४ बलमा १ चौका र १ छक्कासहित २९ रनमा नटआउट रहे ।

अफगानिस्तानका मोहम्मद नाबीले १० ओभरमा ५२ रन खर्चेर २ विकेट लिए । फरिद अहमदले ९ ओभरमा ६१ रन खर्चेर २ विकेट लिए । मुजिब उर रहमान र नूर अहमदले समान एक विकेट लिए । तीन खेलको सिरिजमा अफगानिस्तान १(० ले अघि छ ।