काठमाडौं (हाम्रो खेलकुद) – नेपाली क्रिकेट टोलीका तीव्र गतिका बलर करण केसी आइसिसी एकदिवसीय विश्वकप छनोटमा अमेरिकाविरुद्ध खेलको प्लेयर अफ द म्याच चुनिएका छन् । अमेरिकालाई ६ विकेटले हराउन सानदार बलिङ गरेका करणले खेलको उत्कृष्ट खेलाडीको अवार्ड जितेका हुन् ।

करणले ९ ओभरमा ३ मेडनसहित ३३ रन खर्चेर ४ विकेट लिएका थिए । अमेरिकाका शीर्षक्रमका चार विकेट पावर प्लेमै लिएपछि अमेरिका ९.२ ओभरमा १८-४ को दयनीय अवस्थामा पुगेको थियो ।

करणले ओपनर तथा प्रमुख ब्याटर स्टिभ टेलरलाई ४, साइतेजा मुकामल्लालाई डक, आरोन जोन्सलाई दुई र नोष्तुश केन्जिगेलाई १ रनमा आउट गरेका थिए । करणले सुरुवातमा ७ ओभरमा ३ मेडनसहित ११ रन खर्चेर ३ विकेट लिएका थिए ।

त्यसअघि जिम्बावेका ताकशिंगा स्पोर्ट्स क्लबमा टस हारेर पहिला ब्याटिङको निम्तो पाएको अमेरिका ४९ ओभरमा २ सय ७ रनमा अल आउट भएको थियो । अमेरिकाका सातौं नम्बरका विकेटकिपर शायन जाहांगिरले ७९ बलमा १० चौका र ३ छक्कासहित १ सय रनको सानदार शतकीय इनिङ खेलेपनि जितको लागि पर्याप्त हुन सकेन ।

जितको लागि २ सय ८ रनको मध्यम विजयी लक्ष्य पछ्याएको नेपालले ४३ ओभरमा ४ विकेट गुमाउँदै पूरा गर्यो । नेपालको जितमा भीम सार्की १ सय १४ बलमा ७ चौका र १ छक्कासहित ७७ रनमा नट आउट रहे । नेपालले आफ्नो तेस्रो खेल बिहीबार वेस्टइन्डिज र अन्तिम खेल शनिबार नेदरल्यान्ड्ससँग खेल्नेछ ।