काठमाडौं (हाम्रो खेलकुद) – नेपालले एसिसी यू-१६ इस्ट जोन कपको फाइनलमा मलेसियालाई २ सय २१ रनको फराकिलो अन्तरले हराउँदै उपाधिमा ह्याट्रिक गरेको छ । नेपालले घरेलु टोली मलेसियालाई मात्रै ३१ रनमा अल आउट गर्दै च्याम्पियन बनेको हो ।

यसअघि नेपालले थाईल्यान्डमा सम्पन्न दुई एसिसी यू-१६ इस्टर्न रिजनको उपाधि जितेको थियो । नेपालले २०१७ मा रित गौतम र २०१९ मा विशाल विक्रम केसीको कप्तानीमा यू१६ को उपाधि जितेको थियो । २०१९ को फाइनलमा नेपालले मलेसियालाई ५९ रनले हराउँदै उपाधि जितेको थियो ।

२०१७ को फाइनलमा नेपालले सिंगापुरलाई ७१ रनले हराउँदै उपाधि जितेको थियो । एसिसीले यसअघि यू१६ को प्रतियोगिता इस्टर्न रिजनको नामबाट आयोजना गर्दै आएको थियो । तर यस पटक भने उक्त नाम परिवर्तन गर्दै इस्ट जोन कप राखेको थियो ।

यस प्रतियोगिता २०१९ पछि पहिलो पटक भएको हो । २०२० को अन्तिमबाट संसारभरबाट कोरोना महामारी फैलिएपछि एसिसीले उमेर समूहको प्रतियोगिता आयोजना गर्न सकेको थिएन । कोरोना महामारी अन्त्य भएपछि उमेर समूह प्रतियोगिता आयोजना गरेको छ ।

उमेर समूहमा नेपालको लगातार दोस्रो उपाधि हो । यसअघि गत फागुनमा फाइनलमा नेपालको यू–१९ क्रिकेट टोलीले आइसिसी यू१९ विश्वकप एसिया क्षेत्र छनोटमा नेपालले घरेलु टोली युएईलाई ७ रनले पराजित गर्दै उपाधि जितेको थियो ।

नेपालले उक्त उपाधिसँगै आगमी वर्ष श्रीलंकामा हुने यू१९ विश्वकप खेल्न पाउनेछ । ८ वर्षदेखीको यू१९ विश्वकप यात्रा समाप्त पारेको थियो ।

यू१६ इस्ट जोनको उपाधि जिताउन नेपालका शीर्षक्रमका ब्याटर नरेन भट्टले १ सय १२ रनको अविजित शतकीय इनिङ खेले । कप्तान तथा तीव्र गतिका बलर अभिषेक तिवारीले पाँच विकेट लिए ।

यो पनि पढ्नुहोस् : मलेसियालाई ३१ रनमा अल आउट गर्दै नेपाल च्याम्पियन