काठमाडौं (हाम्रो खेलकुद) – नेपाल एपिएफ क्लब भारतीय वोन्डर्स क्लब नोयडासँग प्रो क्लब टि२० च्याम्पियनसिपमा ८ विकेटले पराजित भएको छ । जितको लागि १ सय ४५ रनको विजयी लक्ष्य नोयडाले १६.२ ओभरमा २ विकेट गुमाउँदै पूरा गर्यो । नोयडाको जितमा ऋतिक भत्सले २१ बलमा ६ चौका र ३ छक्कासहित ४६ रन बनाए ।

हर्षित सेठी ३५ बलमा ३ चौका र ३ छक्कासहित ४५ रनमा अविजित रहे । सिद्धार्थ गोस्वामी ३४ बलमा ४ चौका र २ छक्कासहित ४३, ऋतिक आरोरा १२ रन बनाए । एपिएफका कमल खत्री र विपिन खत्रीले एक एक विकेट लिए ।
त्यसअघि नारायणी क्रिकेट ग्राउन्ड बिरगंजमा टस हारेर पहिला ब्याटिङको निम्तो पाएको एपिएफले २० ओभरमा ५ विकेट गुमाउँदै १ सय ४४ रन बनायो ।

एपिएफका प्रदीप ऐरीले २२ बलमा १ चौका र १ छक्कासहित सर्वाधिक २४ रन बनाए । आसिफ शेख २२ बलमा २ चौका र १ छक्कासहित १९, हरिशंकर शाह २३, सुमित महर्जन ११, सन्दीप जोरा २०, लोकेश बम १९ र अमर सिंह राउटेलाले १७ रन बनाए ।

नोयडाका एलिप्त गुप्ताले ४ ओभरमा २० रन खर्चेर २ विकेट लिए । ऋतिक भत्स, सन्जीव र हर्षितले १–१ विकेट लिए ।
आजको दोस्रो खेलमा आर्मी र उत्तरप्रदेश ११ बीच प्रतिस्पर्धा हुनेछ । आर्मी ३ खेलमा ६ अंकका साथ शीर्ष स्थानमा छ । पुलिस ३ खेलमा ४ अंकका साथ दोस्रो स्थानमा छ ।