काठमाडौं (हाम्रो खेलकुद) – बागमती प्रदेशले प्रधानमन्त्री कप महिला टि२० राष्ट्रिय प्रतियोगितामा कर्णाली प्रदेशलाई १० विकेटले हराउँदै प्लेअफ पक्का गरेको छ । अन्तिम चारमा रहेर प्लेअफ खेल्ने पक्का भएको हो ।

जितको लागि ४३ रनको सामान्य विजयी लक्ष्य पछ्याएको बागमतीले ४.५ ओभरमा कुनै विकेट नगुमाई पूरा गर्यो । बागमतीको जितमा यशु पाण्डेले २० बलमा ४ चौकासहित सर्वाधिक २५ रनमा अविजित रहिन् । त्यस्तै हेलिसा गुरुङ ९ बलमा १ चौकासहित १३ रनमा अविजित रहिन् ।

त्यसअघि माथिल्लो मुलपानी क्रिकेट मैदानमा टस जितेर पहिला ब्याटिङ रोजेको कर्णाली १३.४ ओभरमा ४२ रनमा अल आउट भयो । कर्णालीकी शुर्ती बुढाले ७ बलमा ४ चौकासहित सर्वाधिक १६ रन बनाइन् । बिना थापा १२ रन बनाउँदा अन्यले दोहोरो अंकमा रन बनाउन सकेनन् ।

बागमती प्रदेशकी खुशी डंगोलले ३.४ ओभरमा १८ रन खर्चेर ४ विकेट लिइन् । संस्कृति फुँयालले दुई, सोनी पाख्रिन र विपिशा शाहीले समान एक विकेट लिइन् ।

एपिएफ ५ खेलमा १० अंकका साथ शीर्ष स्थानमा छ । कोशी ६ खेलमा ५ मा जित र १ मा हारसहित १० अंकका साथ दोस्रो स्थानमा छ । सुदूर ६ खेलमा ४ मा जित र २ मा हारसहित ८ अंकका साथ तेस्रो स्थानमा छ ।

बागमती ६ खेलमा ४ मा जित र २ मा हारसहित ८ अंकका साथ शीर्ष चारमा छ । यी चार टोली प्लेअफमा पुगेका छन् । बाँकी कुनैपनि टोली ८ अंकमा पुग्न सक्दैनन् । त्यसैले प्लेअफमा पुग्ने चार टोलीको पनि टुङ्गो लागेको छ ।

शीर्ष दुई टोलीले सोझै क्वालिफायर खेल्न पाउनेछन् । क्वालिफायरमा पराजित हुने टोलीले अर्को फाइनल मा पुग्न दोस्रो क्वालिफायर खेल्ने अवसर पाउनेछ । तेस्रो र चौथो स्थानमा रहनले एलिमिनेटर खेल्नुपर्ने हुन्छ ।