हिमाल खरेल, बिर्तामोड

बिर्तामोड नगरपालिकाले प्रथम झापा जिल्ला अन्तरपालिकास्तरीय पुरुष टि२० क्रिकेट प्रतियोगिताको उपाधि जितेको छ । बुधबारेमा शनिबार भएको फाइनलमा कचनकवल गाउँपालिकामाथि १ सय १९ रनको सानदार जित निकाल्दै बिर्तामोड च्याम्पियन बनेको हो ।

कचनकवलको फितलो ब्याटिङ र कमजोर बलिङको फाइदा उठाउँदै बिर्तामोड विजेता बनेको हो । टस जितेर पहिले ब्याटिङ रोजेको बिर्तामोडले निर्धारित २० ओभरमा ८ विकेट गुमाउँदै १ सय ९६ रन बनाएको थियो । बिर्तामोडका लागि दिपु भुजेलले ५४ रन बनाए । कचनकवलका विक्रम माझीले २ विकेट लिएका थिए ।

१ सय ९७ रनको लक्ष्य पछ्याएको कचनकवल १४ ओभरमा ७७ रनमा अलआउट भएको थियो । कचनकवलका अनिल लामिछानेले १६ रन बनाएका थिए । बिर्तामोडका विशाल आचार्य ३ र रोहित राजवंशीले २ विकेट लिएका थिए । ५४ रन बनाएका दिपु भुजेल फाइनल खेलको प्लेयर अफ दि म्याच भएका थिए ।

प्रतियोगितामा कनकाई नगरपालिकाका प्रनिश विमली उत्कृष्ट विकेट किपर, बुद्धशान्ति गाउँपालिकाका रिजन आङदेम्बे उत्कृष्ट फिल्डर, बिर्तामोडका रोहित राजवंशी उत्कष्ट बलर र सोही टोलीका सिवान्स बजगाई उत्कृष्ट ब्याट्सम्यान चुनिएका थिए ।

बिर्तामोडका दिपु भुजेल इमर्जिङ प्लेयर तथा कचनकवलका कप्तान अनिल लामिछाने सर्वोत्कृष्ट खेलाडी चुनिएका थिए । झापा गाउँपालिकाले फेयर प्ले अवार्ड प्राप्त गर्यो । उपाधिसँगै बिर्तामोडले १ लाख र कचनकवलले ५० हजार रुपैयाँ प्राप्त गर्यो ।

बर्खा स्मृति प्रतिष्ठान बुद्धशान्तिको आयोजनामा भएको प्रतियोगिताका विधागत खेलाडीले ५ हजार र सर्वोत्कृष्ट खेलाडीले १० हजार रुपैयाँ प्राप्त गरे । विजेता तथा उपविजेतलाई प्रतिष्ठानका अध्यक्ष मदनकुमार प्रसाईं, बुद्धशान्ति गाउँपालिकाका अध्यक्ष मनोज प्रसाईं, भद्रपुर झापा गोल्ड कपका अध्यक्ष दिपेश ढकाललगायतले पुरस्कार गरे ।