मस्कट (हाम्रो खेलकुद) – गत संस्करणको उपविजेता युएईले एसीसी मेन्स प्रिमियर कप २०२४ मा सानदार सुरुवात गरेको छ । कुवेत माथि ७ विकेटको फराकिलो जित दर्ता गर्दै युएईले समूह बि मा दुई अंक जोड्न सफल भएको हो ।

कुवेतले दिएको १७९ रनको बलियो लक्ष्य युएईले १७.३ ओभरमै ३ विकेट मात्र गुमाएर भेटाउन सफल रह्यो ।

युएईका लागि आलिशान शराफुले ४८ बलमा ८ चौका र ५ छक्का सहित ९० रन बनाउँदै विष्फोटक इनिङ खेल्दै टोलीलाई जित दिलाए । यस्तै आशिफ खानले पनि समान ४८ बलमा ४ चौका र ६ छक्का प्रहार गर्दै ७४ रनमा अविजित रहे ।

२६ रनमा ३ विकेट गुमाएको अवस्थाबाट इनिङ सम्हालेका यी दुई ब्याटरले १५३ रनको विशाल साझेदारी समेत गरे । युएईका कप्तान मोहम्मद वासिम र तनिश सुरी दुवै शून्य रनमा आउट भएका थिए भने विष्णु सुकुमरणले ११ रन जोडेका थिए ।

कुवेतका लागि शाहरुख कुडुसले २ तथा यासिन पटेलले १ विकेट लिए ।

त्यसअघि अल अमेरत क्रिकेट मैदानमा टस हारेर पहिले ब्याटिङ गरेको कुवेतले निर्धारित २० ओभरमा ८ विकेट गुमाउँदै १७८ रनको बलियो योगफल बनाएको थियो ।

कुवेतका लागि क्लिन्टो अन्टोले २३ बलमा ५४ रन बनाएका थिए भने उसमान पटेलले २७ रन बनाए । यस्तै मीत भवसरले २५ तथा बिलाल ताहिरले २३ रन जोडे ।

युएईका लागि अलि नसिरले र बसिल हामिदले समान ३-३ विकेट लिए भने आयन खान र मुहम्मद फरुकले १-१ विकेट लिए ।

आज नै प्रतियोगितामा थप दुई खेल हुँदै छन् । नेपाली समय अनुसार ४:१५ बजे नेपाल र मलेसिया भिड्दा कतार र हङकङ पनि भिड्नेछन् । यस समूहमा साउदी अरब पनि रहेको छ । युएई र कुवेत रहेको समूह बी मा ओमान, बहराइन र कम्बोडिया रहेका छन् ।

दुवै समूहबाट शीर्ष २ टोलीले सेमिफाइनलमा स्थान बनाउनेछन् । प्रतियोगिताको विजेता मात्र एसिया कपका लागि छनोट हुनेछ ।